Patti Austin da best gihapon
Si Patti Austin 66 anyos pero ang tingog pakantaha maora’g 26. Sexy ug power lang gihapon.
Lola na tan-awon si Patti sa iyang golden hair (ngano wa magtina?) ug simpleng pamayhon pero kuwidaw, ubay-ubay sad diay sa mga musikero ang nibaiid niya sa una.
Secretive siya pag-abot sa lovelife. Pero duna koy nabasahan nga lakip sa iyang nakadate niadtong bata-bata pa siya sila kunong Michael Franks (di ba bading ni siya?), Earl Klugh ug Johnny Mathis. Sa akong sabot single and ready to mingle ang iyang beauty karon.
FAST TALK
Sa fast talk ni Boy Abunda, gipangutana si Patti Austin: “Sex or chocolate? Lights on or lights off? Does size matter?” Ang iyang tubag—“hell yeah!” Haha… Game kaayo si lola!
Jampacked sa mga sponsor ang Cebu concert ni Patti sa Waterfront Cebu City Hotel and Casino pero wala kaayoy tawo sa balcony. Nangambak? Joke!
Happy ang Cebuano fans sa concert kay gikanta tanan ni Patti ang iyang classic hits, sama sa All Behind Us Now, Say You Love Me, How Do You Keep the Music Playing, Baby Come To Me, If I Believe (nga grabeng siyagit sa mga tawo), ug In My Life (nga maoy iyang encore).
THE GREAT WALL
Ang mga kritiko sa Hollywood miingon nga worst film ni Matt Damon ug director Zhang Yimou ang “The Great Wall” tungod sa kataphaw sa estorya.
Ako, usa ray akong masulti, nalingaw ko the max! Kinsay di malingaw nga non-stop action ug nindot kaayo ilang visual. Ang nagdala og nindot ato dili ang estorya kundi ang away ug giyera tali sa tawo ug mananap.
Naghubit ni sa duha ka mga sundawo (Damon ug Pedro Pascal) nga napadpad sa The Great Wall aron pangitaon ang “black powder.” Apan ilang nadiskubre nga giataki sa mga makalilisang nga mananap nga “Taotie” ang mga tsino sa The Great Wall ug kinahanglan ang ilang tabang.
KUNG FU YOGA
Mas gihuy-ab ko sa Kung Fu Yoga. Dili man kaayo nindot ug dili sad ingon ana ka hyper ang mga aksyon ni Jackie Chan kon ikumparar sa mga nangagi niyang pelikula. Ug asa may Kung Fu Yoga ato? Ang mga gwapang co-stars sa Bollywood ra may gibala ni Jackie Chan sa iyang pelikula. Ang gipakita dinhi ni Chan nga kaya pa niyang makig- showdown sa dance floor sa mga batan-on sa edad nga 62.
Pwerte niyang sayaw sa production number sa ilang finale. Maora na hinuong musical. Unsa man ni Lala Land? Haha.. Way klaro.
“LA LA LAND”
Ang “LA LA Land” ang usa sa pinaka da best nga musical sa Hollywood nga akong nakita sa miaging 10 katuig. Ingna kong bakakon pero dako nig tsansa modaug og Best Picture sa Oscar Awards karong Pebrero.
Makabibihag ang iyang estorya luyo sa mga magilakon nga talan-awon sa Los Angeles, diin dunay duha ka struggling artists nga silang Mia (Emma Stone) ug Sebastian (Ryan Gosling) ang nagkahigugmaay apan mas gipili nila ang career nga mahatagan og katumanan.
Si Sebastian usa ka jazz musician nga damgo makabaton og iyang jazz bar ug si Mia theatre actress nga pirme ma- reject sa mga audition.
Ma- in love ka sa ilang pelikula ug way artist tingali nga dili maka- relate sa “LA LA Land.”