Don’t be crazy

SA PAGPANGLABAY sa mga adlaw, wa na gyud magsamok ug maghasol si Benjie nako. Apan morag naguol ko. Morag gipangita ko siya. Dunay mga gabii nga dugay kong makatulog kay si Benjie ang akong mahunahuna. Usa ka adlaw nga nagsuruy-suroy ko sa downtown kay gilaayan ko sa balay, Sunday niadtong adlawa. Gitawgan ko si Raymund kay makigpanuroy ko niya apan di ko siya makontak. Kanunay cannot be reach siya. Nahibulong ko. Apan nahunahuna nako nga tua tingali siya sa lugar nga way signal. Unya kalit ko nakahunong paglakaw kay sa usa ka snack bar, nakita ko si Raymund. Duna siyay kaubang babaye, nga puparehas namog edad. Malipayon sila. Usahay mohapak ang babaye sa bukton ni Raymund.

Nadiyong ang akong mga mata. Nakaila ko sa maong babaye. Si Digna, ang ex-girlfriend ni Raymund. Schoolmate namo ni Raymund si Digna kaniato apan mibalhin kinig laing university human kini makigbuwag kang Raymund. Gisultihan ko aning tanan ni Raymund dihang gisugot ko na siya.

Nagdali kong mipauli. Pagka gabii namisita si Raymund nako. Gisukmatan ko siya sa iyang pagpakig-uban kang Digna.

“Sorry, Chivey. Nagkabalik na mi si Digna. Siya ang akong true love.”

Nakahilak gyud ko. Wa ko magdahom nga maingon niadto ang mahitabo sa among relationship ni Raymund. Apan di ko sab ipamugos ang akong kaugalingon sa lalaki nga nagduwa-duwa lang sa akong gugma. Para nako, giduwa-duwaan lang ni Raymund ang akong pagmahal ug pagsalig niya.

“Sakit kaayo ning imong pagpalaom nako, uy, Raymund. Pero kay si Digna man kaha ang labaw mong gimahal, sukad karon buwag na ta.”

Nagbuntag kong wa makatulog niadtong gabhiona. Gihilakan gyud nako ang among pagbuwag ni Raymund. Apan sa paglabay sa pipila ka adlaw, naka- move on na ko. Tingali, di tinud-anay ang akong gugma kang Raymund kay dali ko ra man nadawat ang among panagbuwag. Usa ka gabii, diha ko sa among lawn. “Good evening.” Nakalingi ko sa gigikanan sa tingog. Si Benjie diay. Milingkod siya sa akong atbang. Nakatan-aw ko niyag dugay. Namatikdan nako nga midaot siya. Namiyahok ang iyang mga aping.

“Sorry sa nahitabo sa inyong relasyon ni Raymund. Nagkasulti mi ganina. Naatol nga nagkita mi sa downtown. “Okey lang, uy. Wa na ko maghunahuna niya.” “May chance pa tingali ko nimo, Chiv.” Gitan-aw kog dugay si Benjie. Unya gipahiyoman ko siya. May nabatyagan kong lahing pagbati karon ngadto niya. Gipasagdan ko siya dihang mikupot siya sa akong kamot. (KATAPUSAN)