UV kampyon sa Cabanero Cup

GIPANGPUKAN sa University of the Visayas (UV) Green Lancers ang Cebu Institute of Technology University (CITU) Wildcats, 97-88, aron angkunon ang korona sa 2nd Capt. Raul Cabanero InterCollegiate basketball tournament sa Bulacao, Talisay Sports Complex.

Sa pagpangulo nila ni Jerome Napao ug Rey Suerte, ang Green Lancers nakapagawas dayon sa mabangis nilang puwersa aron pagposte og 27-18 nga labaw human sa 1st quarter.

Nagpadayon ang kainit sa opensa sa Green Lancers ug ilang nainat ang ilang labaw sa 52-37 sa halftime.

Sa pagpangulo ni Joshua Dela Cerna, ang Wildcats ning-aksyon paggukod sa 4th quarter apan wala ra gihapon sila makasugakod sa mas lig-ong puwersa sa Green Lancers.

Ang Green Lancers gipangulohan ni Napao pinaagi sa iyang 21 puntos samtang si Suerte, kinsa maoy napiling MVP sa torneyo, nidugang og 18 puntos.

Nagbangis si Dela Cerna ug nagpakatap kini’g 48 puntos apan kuwang ang iyang suportang nadawat gikan sa iyang mga kauban.

Sa kadaugan, naangkon sa Green Lancers ang P50,000 nga ganti samtang P30,000 ang nakuha sa Wildcats isip 2nd placer.

Ang 3rd placer nga mao ang University of San Jose Recoletos (USJR) Jaguars nakaangkon og P20,000 samtang P10,000 ang nadawat sa 4th placer nga mao ang University of Cebu (UC) Webmasters.

Nahimong posible ang pagpahigayon sa torneyo gumikan sa paninguha ni Bulacao Barangay Captain Raul Cabanero inabagan sa iyang mga konsehal nga sila si Banjo Abastillas, Darwin Cabanero, ug Agnes Lastimosa.

Ang torneyo nagsileng pre-season sa Cebu Schools Athletic Foundation Inc. (CESAFI).

Aduna kini pagtugot gikan ni Cesafi commissioner Felix Tiukinhoy.

Nagpadagan sa torneyo mao si Cesafi deputy commissoner Danny Duran inabagan ni tehnical head Edwin Dejacto Sr. Puntos matag usa UV (97)- Napao 21, Suerte 18, Gahi 14, Segumpan 12, Balabag 9, Maestre 7, Macion 5, Bolanio 4

CITU (88)- Dela Cerna 48, Sable 10, Lucena 10, Ariar 10, Pono 8, Sanchez 2.