P40 FLAGDOWN SA TAXI IBALIK

Apan order sa LTFRB Manila huwaton sa regional office

DUMPSITE SA MANDAUE GIPASIRHAN SA CENRO

KOREA. Ang Mandaue City Government mipahunong sa operasyon ning usa ka dumping site sa Brgy. Tingub tungod sa way permisong paglabay og plastic waste gikan sa South Korea sulod sa pribadong lote. Ang City Environment and Natural Resources Office (Cenro) niisyu og citation ticket alang sa Enviro-Tech human giingong makalapas sa duha ka mga ordinansa sa Siyudad. Kini mao ang paghimo nga dumping site ug paghakot og mga hugaw. Matod ni Edmund Roxas sa Enviro-Tech nga ang lote ila rang gigamit nga yarda.

GIUYONAN sa Land Transportation Franchising and Regulatory Board (LTFRB) ang petisyon sa pagpabalik ngadto sa P40 sa flagdown rate sa mga taxi dinhi sa nasod.

Apan, pabilin nga P30 ang flagdown rate sa taxi sa Sugbo bisan kon giuyonan na kini LTFRB head office.

Giklaro sa LTFRB 7 nga hangtod wa pa maluwati ang mando sa ilang ulohang buhatan, di pa mapatuman ang pagpabalik ngadto sa P40 sa flagdown rate sa taxi.

Matod ni LTFRB 7 Assistant Regional Director Reynaldo Elnar nga hangtod wala pa sila’y nadawat nga guidelines ug order gikan sa kaulohan, pabilin nga P30 ang provisional rate nga flag-down.

Samtang si LTFRB 7 Regional Director Ahmed Cuizon niingon nga ang pormal nga mando o hukom wa pa mapirmahi sa chairman ug sa board members sa ilang ulohang buhatan.

Apan siya nagtuo nga karong adlawa mapirmahan na kini.

“After the signing, it will be published in a national newspaper of general circulation. Only then will the formal order take effect,” pasabot ni Cuizon.

Si Cuizon niingon nga ang petisyon alang sa pagpabalik sa kanhi flag-down rate giduso sa Philippine Taxi Operators Association (PTOA) diin ang Metro Cebu Taxi Operators Association (MCTOA) sakop.

Kini nagpasabot nga ang mga taxi sa Sugbo apil na sa mao nga mando isip sakop sa PTOA ug di na kinahanglang moduso og petisyon.

Ang kasamtangang flagdown rate nga P30 namugna human sa grabeng pag-us-us sa presyo sa lana sa merkado sa kalibutan sukad niadtong 2014.

Apan ning nakalabay nga mga buwan, hinayhinay nga nisaka ang presyo sa lana sa kalibutan hinungdan sa pagsaka sa presyo sa mga produktong petrolyo.

Wa usba ang calibration sa mga taxi meter, apan kon unsa ang natala niini, kuhaan ra kini og P10.

Gibutyag usab si Elnar sa Superbalita Cebu nga dihang nagsugod ang P30 nga provisional flagdown, daghan ang nangreklamo, karon kay wala na.

Ning mao nga kalambuan, ang chairman sa Cebu Integrated Transport Service Cooperative (Citrasco) niingon nga dako kini og ikatabang sa kita sa mga driver.

Si Citrasco Chairman Benjamin Ryan Yu niawhag sa mga taxi operator sa di pagpaumento sa abangan sa taxi unit ning panahuna aron makapahimus ang mga taxi driver sa bag-ong mando.