Warrant of arrest alang sa kanhi mayor
ANG Sandiganbayan nimando sa pagdakop kang kanhi Aloguinsan Mayor Cynthia Moreno, lima ka mga opisyal ug laing duha ka mga tawo human sila makombikto sa kasong graft.
Kini may labot sa pagpalit og construction materials balor og kapin sa P1 million nga way public bidding sa 2007.
Ang First Division sa anti-graft court niluwat sa warrant of arrest alang kang Moreno ug pito ka mga gikombikto human ang Sandiganbayan nisalikway sa ilang mga petition for relief.
“To re-open the case would be tantamount to a review of the evaluation and the final verdict of the Supreme Court upholding the conviction of the accused,” matod sa hukom sa Sandiganbayan nga gipetsahan og Enero 9, 2017.
Si Associate Justice Efren de la Cruz, chairperson sa anti-graft court First Division chairperson, maoy nisuwat sa resolution nga giuyonan nila ni Associate Justices Michael Frederick Musngi ug Reynaldo Cruz.
Si manlalaban Inocencio dela Cerna, tigpamaba ni Moreno, niingon nga ang mga gipangkombikto duna pay daghang magamit nga mga paagi aron makabot ang hustisya.
Niadtong September 2014, sila si Moreno ug kaubang respondents napalgan sa anti-graft court nga “guilty beyond reasonable doubt” sa paglapas sa Section 3(e) sa Republic Act 3019, kun Anti-Graft and Corrupt Practices Act.
Laing napalgang sadan mao sila si Municipal Budget Officer Nonela Villegas, Municipal Agricultural Officer Marilyn Flordeliza, Municipal Assessor John Lim, Municipal Engineer Orven Nengasca, Municipal Civil Registrar Pepito Manguilimotan and utility workers Gertrudes Ababon ug Emilia Luz Celis.
Sila gipahamtangan og silot nga pagkabilanggo og unom ka mga tuig ug usa ka buwan ngadto sa 10 ka mga tuig.
Gidid-an na usab sila sa pagtrabaho sa kagamhanan.