CCCI motuman sa P13 nga umento

MALAUMON ang business sector sa Sugbo nga magmugna og maayo nga resulta ang ipatuman nga dugang nga P13 nga suholan sa Central Visayas.

Bisan paman og magtagbo pa pagbalik ang Regional Tripartite Wages and Productivity Board (RTWPB) 7 karong Pebrero 13 aron pagahisgutan kanusa ipatuman ang pagsaka, mga negosyante sa Sugbo nipadayag na nga tumanon kini nila subay na sa mando sa gobyerno.

Ang Cebu Chamber of Commerce and Industry (CCCI) nibutyag nga taas ra ang P13 nga dugang sa suholan sa inadlaw-adlaw alang sa mga minimum wage earners base na usab sa ilang kuwentada base sa posible nga epekto sa negosyo sa Sugbo susama sa pagsira, pagtangtang og empleyado o pagkawagtang sa investments.

Hinuon, base sa statement nga gipadala sa Presidente sa CCCI Melanie Ng, nga pabilin silang mohatag og suholan nga ikatandi usab sa ubang mga nasod sa Asya.

Pasalig usab nila nga pabilin sila nga modani og investors sa Sugbo aron daghang oportunidad sa trabaho alang sa kadaghanan.

Samtang si Cebu Business Club president Gordon Alan Joseph sa iyang bahin nagkanayon nga way problema kaniya ang pagsaka sa suholan apan malaumon siya nga maghatag kini og produktibo nga mga empleyado sa ilang tagsa-tagsa ka trabaho.

Si Prince Guian Delos Reyes kinsa kasamtangan nga nangita pa karon og regular nga trabaho, nagkanayon nga gamay ra ang umento apan maayo nalang kay aduna’y pagsaka.

Apan nitataw siya nga sa lifestyle ug cost of living karong sa Sugbo, dili paigo ang P366 matag adlaw.