Drug den sa Duljo gironda

WALO ka mga tawo, usa ini menor de edad, ang nasikop sa Philippine Drug Enforcement Agency (PDEA) 7 sa ilang buy bust sa usa ka drug den sa Brgy. Duljo Fatima, dakbayan sa Sugbo niadtong Lunes sa gabii.

Kapin sa P500,000 nga balor sa drugas ang nasakmit gikan sa giingong tag-iya sa drug den sa Sitio Mansinitas.

Ang nasikop giilang mao si Ronie Campanilla, 22, ex-convict, giingong nagpadagan sa drug den.

Lakip sa nasikop ang 17 anyos nga lalake nga taga Quiot Pardo; Winsmie ‘Insik” Legason, 48, tata Duljo-Fatima; Sergio Pitogo, 48, taga Quiot Pardo; Arjay Dayo, 24, taga Dujo-Fatima; James Paes, 18; Ronald Ripdos, 28; ug Albert Gendrauli, 25.

Si Campanilla taudtaud na nga gipanid-an sa PDEA-7 samtang nagpadagan sa drug den sa dugay nang panahon. Iyang mga silingan nangreklamo na. Si PDEA 7 Regional Director Yogi Filemon Ruiz nihulagway nga ang drug den nagsilbing one-stop-shop sa mga kustomer ni Campanilla, diin anha mopalit dayon ug anha magsuyop.

Si Campanilla nalakip sa ilang mga high value target (HVT) kay makabaligya og binultong shabu matag semana.

Nakuha gikan kang Campanilla, ang buy bust money, mga drug paraphernalia, 11 ka dagkong putos, laing usa ka dakong bulto sa putos nga ang tanan motimbang og 200 gramos nga mobalor sa P600,000.

Si Campanilla, nga gikuhaan sa iyang habig sa Superbalita Cebu niingon nga mosuyop siya ug nadakpan na kaniadto tungod sa illegal drugs.