Market official OIC sa Ermita

INAY caretaker sa barangay Ermita, si SPO1 Adonis Dumpit motutok sa pagpatuman sa kahapsay ug kalinaw sa barangay kansang mga barangay opisyal gihurot og suspenso sa Ombudsman.

Gitudlo ni Osmeña si Market Administrator Atty. Winefredo Orcullo isip caretaker aron maoy motimon sa barangay samtang wa pa ang pormal nga direktiba gikan sa Department of Interior and Local Government.

Si Dumpit gibalhin na sa Police Station 5 sa Cebu City Police Office (CCPO).

Niadtong Lunes, di momenos 100 ka mga tawo sa Ermita ang nag-wilga aron ilang babagan ang paglingkod ni Dumpit isip caretaker nga niresulta sa pagkandado sa barangay hall.

“When they are trying to close the barangay, I’m happy they want to do that because they are scared,” padayag ni Osmeña.

Matod sa mayor epektibo sugod kagahapon ang iyang kamanduan sanglit ilawom sa balaod, ang Ermita nga sakop sa Cebu City ubos sa iyang hurisdiksyon.

Ang pagtudlo ni Osmena kang Dumpit ug karon ning bag-o wala gihapon gustohi sa taga barangay apan wa kini panumbalinga sa mayor.

“Di sila mosugot? They are entitled to voice their own opinion. But they cannot order me,” dugang sa mayor.

Gusto nila taga barangay Ermita ang mohulip ni Brgy. Capt. Felicisimo “Imok” Rupinta o piniling opisyal nga sakop sa Team Rama kansang partido kaalyado sa barangay.