BDO-Magallanes pasirad-an

PASIRAD-AN ni Mayor Tomas Osmeña ang Banco De Oro Magallanes branch inig balik niya sa dakbayan sa Sugbo gikan sa Japan ug Taiwan.

Karong adlawa, si Osmeña mobiya sa Sugbo paingon sa maong mga nasod aron motambong sa opisyal nga kalihukan.

“When I come back that’s when I will close it them. If I don’t close it then nobody will believe me anymore. People will think I made money so I will close it,” padayag sa mayor.

Atol sa press conference kagahapon, si Osmeña nipakita sa duha ka sensiyo, usa ka singko ug usa ka peso ug nibutyag nga ang maong kantidad maoy buhis sa pagnegusyo sa BDO Magallanes matag adlaw apan iyang gibutyag nga iyang gipasobrahan sanglit sa ilang kwentada moabot ra kini og P5.50.

Gipabuhagay sa mayor nga mailad sa BDO ang tibuok Pilipinas apan dili ang dakbayan sa Sugbo nga ilawom sa iyang pagdumala. “Don’t tell me you are paying P6 and you are compliant with the law and that’s their only income. If we have tax payers like that, the city will not survive anymore,” matod ni Osmeña.

Gipahimug-atan sa mayor nga dili siya ang gilimbungan sa BDO kon dili ang mga Sugbuanon ug ang tibuok Sugbo.

Sa pagsira unya ni Osmeña sa BDO Magallanes kinsa nibahad nga iyang sundan og laing branch hangtod mapatak-opan niya ang tanan branch, nanghinaot siya nga pasakahan siya og kaso sa management sa maong banko aron mag-abot sila sa korte ug mautingkay ang ilang tanang record.

Gipadayag niya nga ang Cebu City Government naghatag og financial assistance sa 80,000 ka senior citizen balor og P12,000 matag tuig ug iyang gihulagway nga magkinahanglan og 1,000,000 ka branch sa BDO aron mahatag ang maong ayuda.

Ang BDO niingon nga nisunod sila sa balaod ug mga rekisito apan ang City Government nagdumili sa paghatag kanila og permit.

Nangayo na usab sila og pasaylo ngadto sa ilang libuan ka mga kliyente gumikan sa kahasol nga namugna sa maong kontrobersiya ug nipasalig nga maserbisyohan gihapon sila sanglit ang maong isyu nakasentro ra sa dakbayan sa Sugbo ug way labot ang uban nilang mga branch sa laing lugar.

(AMPER CAMPANA) PASIRAD-AN. Gibaharan karon ni Cebu City Mayor Tomas Osmena kining Banco de Oro-Magallanes branch (makita sa wala nga bahin sa ibabawng hulagway) nga iyang pasirad-an sa higayon nga mahibalik na siya gikan sa laing nasod.