3 gikulata, gipandunggab sa 5 suspek

DIMIAO, Bohol - Tulo ka lalaki ang gidala sa duol nga tambalanan human giingong gipangkulata ug gipangdunggab sa lima ka mga suspek nga giingong namaregla ngadto sa mga biktima didto sa Barangay Balbalan, lungsod sa Dimiao niadtong miaging Lunes sa gabii.

Giila ang mga biktima nga sila si Socrates Eramis, 34, ug usa ka mag-uuma, Elumbaring Buagas, 26, nga usa ka traysikol drayber ug si Mart Neil Aclon, 22, ulitawo nga samang residente sa barangay Bakilid, lungsod sa Dimiao.

Sa pasiunang pakisusi sa kapulisan nasayran nga samtang ang tulo ka biktima nagtagay sud nga bahin sa may Seaside Beach Resort, kalit lang nga miduol ang mga suspek ngadto sa atbang nga lamesa diin didto nagtapok ang mga biktima ug dayong gitabangan pagkulata ang biktima nga si Socrates.

Misuway sa pagpabugnaw sa mga suspek ang duha ka kauban ni Socrates, apan ang duha ka biktima na hinuon ang giatubang sa mga suspek ug giingong gipangdunggab kini.

Nakaangkon si Aclon og samad dinunggaban sa walang bahin sa tiyan samtang si Elumbaring sa may dughan nga bahin.

Gidala dayon ang mga biktima sa duol nga tambalanan didto sa may Dimiao Municipal Infirmary ug luwas nga nakagawas human nadapatan og tambal sa tambalanan. Misibat dayon ang mga suspek human sa nahitabo.

Dugang pa, giingon nga ubos sa ilimnong makahubog ang mga suspek.

Gisuwayan sa kapulisan sa paglutos ang mga supek apan pakyas sila sa pagsikop apan padayon imbestigasyon sa insidente.