Laagan nga asawa

Dear Papa Joe,

Tawga lang ko og Gabriel, taga Toledo City, 19 years old. Ang akong problema karon ang akong asawa. Naa mi usa ka anak nga lalake nga 3 months old.

Dugay na ko nakabantay sa akong asawa nga hilig kaayo siyag barkada nga lalake. Niadtong usang adlaw, nangita mig puso sa saging kauban sa akong mga amigo. Sa dihang nag una akong asawa ug ang akong amigo nga lalake nga sweet kaayo sila. Nag-holding hands. Ako siyang gitawag but wa ko paminawa.

Karon nitabang ko og ihaw sa baboy. Magsige siya og tan-aw nako aron kon ma- busy na ko, makalaag siya. Naay time nitalikod na ko kay magkiskis sa balhibo sa baboy, nilaag siya sa payag. Wala siya mananghid nako. Sakit kaayo para nako kay iyang kuyog lalake. Pag-uli niya, akong gipangutana kon nag-unsa siya didto, di ko niya tubagun.

Usa ka higayon, niingon ko niya nga I- open ang FB kon kinsa ang iyang ka chat. Di sab siya motingog. Iya kong giingnan nga layas, ipakuha ang tanan nakong gamit aron di na ko mobalik. Unsa may imong ikatambag nako ? Tambagi ko ug daghang salamat. GABRIEL Gabriel,

Dong, paminaw nako wala pa siguro mo makasal kay 19 pa man ka. Sa akong bana-bana, bata pa sab ang imong pares kay sa iyang nilihukan base sa imong sulti, wala pa gyuy buot. Bata bataon kay gawas nga naa na ka nga iyang pares, naa na sad moy anak.

Mao lagi nay resulta sa sayong panagtipon nga wala sa oras kay maguba inig ka hupas. Kon wala pa mo makasal ug gipalayas na ka niya, mas maayo siguro magbuwag mo hangtod nga ma- mature mo. Basin magka kamo pa gyud. Pero ayaw lang kalimti imong obligasyon sa inyong bata. Pero kon kasado mo, mas maayo mangayo mo og tabang sa inyong mga ginikanan. Kana lang ug salamat. PAPA JOE

(sa inyong tampo ipadala lang sa papajoesuperb@gmail. com)