The way I love you
NAGKUSMOD kong miduol kang Leo pagkakita ko niya nga migawas sa dressing room. Gikan silang nagpraktis og volleyball. Star player si Leo sa among team sa volleyball, sakop siya sa varsity team. Malipayon siya pagkakita nako.
Gitulisok dayon nako siya. Nahilaw ang iyang kinataw-an ug naglingi-lingi siya kay kami ra man ang gitan-aw sa kauban namong mga estudyante. Apan wa ko sila tagda. Gusto kong ipagawas ang akong kasuko kang Leo.
“Nganong gipahilak mo ang akong half-sister? Kamaayo nimong tawhana, no? Wa man gani mi makapasakit si Mama ug Papa niya, unya nakahimo ka ani ngadto niya?”Nanighawak ko sa atubangan ni Leo.
“Please listen to me, Kareen. Ayaw dayon ko hukmi nga maoy ngil-ad.”
Hinay ang tingog ni Leo. Iyang gikuptan ang akong bukton. Giwakli ko ang iyang kamot. “Unsa man diay ang itawag nimo, buotan?” “Adto ta mag-estorya sa gawas, Kareen. Parehas na man tang way klase. May sab nang maminaw ka sab sa akong side.”
Hapon na niadtong tungora ug pulos na nahuman ang among mga klase ni Leo para niadtong adlawa. “Sige!” Gisingkahan ko si Leo. Sa usa ka snack bar mi manulod si Leo. Milingkod ko sa lamesa nga simpig sa bungbong nga bildo, samtang si Leo miadto sa counter aron pag- order sa among pagkaon ug drinks.
“Duna koy gikaestoryang girl yesterday, Kareen. Paraygon siya nako. You why? Shes’s my first degree counsin ug very close gyud mi. Bag-o siyang nahiabot gikan sa London, mibakasyon lag one week kay duna siyay giasikaso dinhi.”
Miinom ko sa akong pineapple juice sa akong baso. Naghilom lang ko.
“Mianhi man gud siya sa atong gieskuwelahan. Na- surprise ko, uy, kay wa man ko makahibawo nga nia diay siya sa Cebu. Tua na man gud sila mamuyo ug ang iyang parents sa London. Mihawok siya sa akong aping. Ug mikupot siya sa akong kamot samtang nanulod mi sa canteen. Nakakita diay si Joy namo. Ug mao na. Nagselos siya ug iya kong giaway. Mopasabot unta ko niya pero nagdali siyang mibiya nako ug sa akong ig-agaw. Naghilak siya.”
“Tinuod nang imong giingon, Leo?” Hinay na ang akong tingog dayon kong ingkib sa hamburger.
“Yes, Kareen. Wa ko mamakak nimo. You know, grabe ka selosa ang imong half-sister. Kadaghan na niya akong awayon, uy, kon makakita siya nako nga dunay koy gikaestoryang babaye sa eskol.”
Gitan-aw kog dugay si Leo. Guol ang iyang nawong. (SUMPAYAN)