Seguridad sa Cviraa pahugtan sa Naga

GIPANEGURO sa kagamhanan sa City of Naga nga sa ikaduha nilang sunodsunod nga paghost sa Central Visayas Regional Athletic Ass. (CVRAA) meet dili na masubli ang nahitabong pagtulis sa usa ka magtutudlo sulod sa gipuyan niining tunghaan.

Karong Domingo ablihan ang kompetisyon.

Si Mayor Kristine Chiong nibutyag nga anaa na sila sa 95 porsiyento nga andam sa kalihukan gikan sa venue, preparasyon, ngadto na sa seguridad.

Iyang gibutyag nga ang siyudad migahin og nuybe milyones pesos alang sa maong kalihukan, mas dako og dos milyones sa ilang paghost sa miaging tuig.

Matod Chiong nga maayo kini karong tuiga tungod kay ang tanang mga duwa ipahigayon na sa ilang siyudad sanglit nahuman na man ang ilang swimming pool.

Gikatakdang mangabot ang tanang mga atleta gikan sa Rehiyon 7 karong Huwebes o ba kaha sa Biyernes.

Nagkanayon si Chiong nga ilang gipaningkamotan nga maoy mohost aron mailhan ang dakbayan sa Naga ug gawas pa agig tabang sa mga atleta.

Kagahapon gipatawag ni Chiong ang mga barangay kapitan diin didto sa ilang barangay magpuyo ang mga atleta. Nagkinahanglan si Chiong sa mga lider sa barangay alang sa pagmintinar sa kahusay’g kalinaw ug kalimpyo.

Si Supt. Gregorio Galsim nibutyag nga adunay 17 ka mga tunghaan sa Naga ang gihimong puyanan sa mga atleta ug mao kini ang ilang gihugtan sa pagbantay.

Matod ni Galsim nga nangayo na sila’g augmentation force gikan sa Cebu Provincial Police Office ug sa Regional Public Safety Company.

Iyang gibutyag nga matag tunghaan ilang butangan og tagupat ka mga pulis nga mobantay 24 oras, wala pay labot sa mga barangay tanod.

Si City Administrator Engr. Gregorio Villamaor nibutyag nga sa pagkakaron, ang ilang gihimo mao na lang ang pagtarong sa mga venue sama sa mga suga ug pagbago sa mga pintal inabagan sa mga kawani sa city hall.