Cotto mas gustong kontrahon ni Marquez

GIPABUHAGAY ni kanhi four-division world champion Juan Manuel Marquez nga mas importante alang kaniya ang pagpakigaway kang Puerto Rican Miguel Cotto alang sa garbo ug dungog kaysa sa dakong kantidad nga iyang madawat kon makigharong siya kang Filipino boxing icon Manny Pacquiao sa ikalimang higayon.

Hinuon giklaro ni Marquez nga kinahanglan pa’ng mahibalik ang iyang siyento porsiyentong kondisyon una niya ifinalize ang sunod niyang away.

Mismong si Cotto ang nibutyag nga ang iyang promoter nakigsabot og balik sa kampo ni Marquez.

Sa miaging tuig, seryuso ang negusasyon sa duha ka mga kampo apan wala madayon.

Si Marquez gitanyagan og dakong kantidad alang sa ikalima nilang panagharong ni Pacquiao apan gibalibaran kini sa Mexican fighter.

Mismong ang promoter ni Pacquiao nga si Top Rank boss Bob Arum ang miingon nga nakigsulti na siya kang Marquez apan wala na’y interes ang naulahi sa pagpakigaway og balik kang Pacquiao bisan pila pa ang kantidad.

Daan na’ng nipadayag si Marquez nga gusto niya nga mahimumdoman nga maoy brutal nga nagknockout sa Pambansang Kamao sa Pilipinas, nga nahitabo sa ikaunom nga round sa ikaupat nilang away.

“I was offered a fifth fight with Pacquiao for a very good amount of money. The economic factor is important, but what moves me more is legacy... it moves me more to have a great opponent in the ring,” matod ni Marquez sa interbyu sa Golpe a Golpe.

“With Pacquiao we closed that chapter and Cotto is a great fighter, he has a great legacy, the Mexico-Puerto Rico rivalry that is always at the top of the mountain.”