Naa’y ma-K.O.
ADUNAY ma- knockout sa bugtong babaye nga parisan sa gikaintapang Cebu Extreme Fight League 2: “No Way Out” nga gikatakda karong Pebrero 18 sa Cebu Coliseum.
Mao kini ang panahom sa nagpasiugda sa promosyon nga si Yaw-Yan ArDigma CEO/Founder ug Vis-Min director Master Benigno ‘Ekin’ R. Caniga Jr.
Gitumbok nga away mao ang tali nila ni kanhi Southeast Asian Games gold medalist Marianne Mariano batok wala’y pildeng kickboxer sa Amerika nga si Andrea Erickson.
“Excited kaayo ko aning awaya kay pulos ni elite lady strikers. Pareho ni silang maayo moaway maong tan-aw nako, naa gyu’y ma- knockout aning awaya,” matod ni Master Ekin.
Si Mariano, kinsa nagbase sa Lapu-lapu City isip sakop sa Philippine Air Force, midaog og gold medal sa wushu event atol sa 24th Southeast Asian Games sa Thailand niadtong tuig 2007.
Ang lumad nga taga Baguio City nga si Mariano nakadesisyon nga mobalik sa combat sports human siya nakaagi og maayong training sa SELDEF MMA ni kanhi Cebuano MMA champion Carry ‘Prince’ Bullos.
Gipasabot ni Mariano nga dili na man tuod siya aktibo sa combat sports apan wala siya mobiya sa combat sports.
Dili sayon ang sagubangong away ni Mariano batok kang Erickson, sakop sa Yaw-Yan Fervilleon Black Falcon ug wa’y pilde sa upat niya ka kickboxing fights.
Ang away nila ni Mariano ug Erickson usa lang sa mga mohatag og lamas sa promosyon, nga mogamit og octagon.
Sa main event sa promosyon, magsangka sila si Yaw-Yan ArDigma featherweight prospect Roel ‘Akiyama’ Rosauro batok Brazilian jiujitsu-belter Urtych ‘ Tank’ Allarin sa XFC MMA sa Butuan City.
Ang mga ticket nagbalor og P200 sa upperbox, P500 sa lowerbox, P750 sa ringside ug P1,000 sa VIP/Sponsor.
Alang sa dugang mga impormasyon, mahimong motawag sa 255-1405 o 0943-6568900.
ESL