KULBA NGA KADAUGAN

NAKAPASULOD og makapaukyab nga three-point shot si LeBron James nga nakapugos og overtime unya nagmangtas si Kyrie Irving sa ulahing bahin aron agakon ang Cleveland Cavaliers sa 140-135 nga kadaugan batok sa host Washington Wizards kagahapon sa National Basketball Association (NBA). Sa usa ka duwa nga sama sa playoffs ang kombati, ang defending champions ning- rally sa overtime human na- foul out si James aron putlon ang 17 ka sunodsunod nga kadaugan sa Wizards sulod sa ilang balwarte. Gikan sa sinugdanan hangtod sa katapusan, ang duha ka mga kampo nagpinugaay sa ilang tanang katakos sa grabe ka kulbahinam nga engkuwentro. “It was an instant classic -- a great basketball game by two really good teams,” matod ni Wizards coach Scott Brooks.

Sa samang adlaw diin nigawas ang taho sa New York Daily News nga nagtinguha si James nga mabalhin ang iyang kaubang si Kevin Love sa New York Knicks baylo kang Carmelo Anthony, si Love nagbangis ug nagpakatap kini’g 39 puntos ug 12 rebounds aron pangulohan ang kadaugan.

Hinuon gitataw ni Cavaliers coach Tyronne Lue nga dili nila tugotan nga mabalhin si Love.

“Thirty-nine and 12? We’re going to trade him tonight,” batbat ni Lue. “He’s not going anywhere.”

Gihulagway sab ni James ang taho sa New York Daily nga usa ka basura. “That’s trash,” matod niya. Napasulod ni John Wall ang iyang duha ka freethrows sa nahabiling 3.4 segundos sa regulation period aron hatagan ang Wizards og 120-117 nga labaw.

Sa usa ka inbound pass gikan sa ilawom sa pikas bahin korte, gihapos ni Love pagpasa ang bola ngadto kang James.

Wala maglangan og oras ang 4-time MVP ug nikalit kini’g balising alang sa iyang makapakurat nga fadeaway 3-pointer atubangan sa depensa ni Bradley Beal aron ipugos ang overtime.

“LeBron made a heck of a shot that he would probably make one out of a million times,” batbat ni Wall.

Sa overtime, si Irving na ang miagak sa Cavaliers. Gimugna ni Irving sa overtime ang 11 sa iyang kinatibuk-ang 23 puntos.

Si James nidugang og 32 puntos ug career-high 17 assists alang sa Cavaliers samtang nitampo og 22 puntos si Tristan Thompson.

“(We won) by executing at a high level. I’m glad we pulled it out -- great win. Motivating,” matod ni Irving.

Ang Wizards gipangulohan ni Beal pinaagi sa iyang 41 puntos, nidugang og 25 puntos si Otto Porter Jr. samtang nitampo og 22 puntos si Wall.

(AP PHOTO) HANSAK. Gihansakan ni Cleveland Cavaliers forward LeBron James (23) ang depensa ni Washington Wizards forward Markieff Morris (5) ning aktuha sa usa sa mga aksyon sa NBA kagahapon.