Maestro nga adik ipa-rehab

(Napatik sa Superbalita CDO, Enero 28, 2017)

GIPANAWAGAN karon nga ipatahan ang mga magtutudlo nga nalambigit sa gidili nga drugas human duha ka mga maestro ang nasikop sa buy-bust operation.

Kini ang panawagan ni Dr. Rey Manuel, Assistant City Division Supirentendent sa siyudad sa Cagayan de Oro, ngadto sa mga magtutudlo nga nalambigit sa gidili nga drugas.

Matud ni Manuel nga kun mahimo mosurender na lamang tungod kay andam silang motabang aron mabalik ang moralidad ug marehabilitar.

“Ato silang tabangan nga ma-rehab ug mabalik ang moral,” matud ni Manuel.

Kini nga pamahayag migawas human sa pagkasikop sa duha ka magtutudlo sa kapulisan sa Police Station 8 (PS8) sa Lumbia human nasakpan sa drug buy bust operation.

Ang mga dinakpan naila nga sila si Velijun Perez, 36, ulitawo ug Alex Dela Vega, 39, ulitawo, taga Zone 9, Macanhan ning dakbayan ug nagtudlo sa tunghaan pampubliko diha sa Barangay Carmen ning siyudad.

Giangkon ni Manuel nga wa silay memorandum nga mag- require sa magtutudlo nga magpa- drug test ug boluntaryo lamang kining himoun. Ang adunay rekisitos sa pagpadrug test mao lamang kadtong mosud sa trabaho sa pagkamaestra ug maestro. Kagahapong adlawa nahitabo ang management conference sa tanang principal sa mga tunghaan diin gibutyag ni Manuel nga hisgotan nila ang operasyon alang ning tuig 2017 ug lakip na niini ang pagkalambigit sa duha ka magtutudlo sa pagpayuhot og gidili nga drugas. Daw gihuwat lang usab nila ang kasong ipasaka sa pulis batok sa duha usa sila mohimo og aksyong administratibo batok sa duha ka mga dinakpan.