Sinakong basura gikan sa Korea nadiskobrehan

GITATAW ni Atty. Elaine Bathan, executive secretary ni Mandaue City Mayor Luigi Quisumbing, nga andam pasakaan nila og kaso ang tag-iya sa basura ug tag-iya sa truck nga nag- operate ug pribadong dumpsite sa Brgy. Tingub sa dakbayan.

Matod ni Bathan nga naghuwat pa usab ang iyang buhatan karon sa report sa City Environment and Natural Resorces Office (Cenro) kon diin gyud gikan ang basura nga gilabay sa maong dapit.

Ingon niya nga wa nakahatag ug tukmang dokumento ug permiso ang Enviro-tech, ang kompanya nga nag- operate sa pribadong dumpsite nga ginadili ubos sa balaod.

Matod ni Bathan nga ila pang gituki karon kon gikan ba gyud sa nasud sa South Korea ang mga basura.

“Cenro nato is trying to trace the source of the garbage, of these toxic materials. I have yet to confirm the final report and findings from Cenro and that will include diin ni gikan, kinsay tag-iya from the source, who imported these here, who is the importer from Cebu, who is the owner,” dason ni Bathan.

Padayag niya nga kon mapamatud-an nga gikan sa Korea ang basura, makigkoordinar unya ang dakbayan sa consul dinhi sa Sugbo kalabot niini.

Gitataw ni Placido Jerusalem, assistant officerin-charge sa Cenro nga iligal ang operasyon sa pribadong dumpsite sa Brgy. Tingub.

Ang luna nahimutangan sa dumpsite anaa sa pribadong luna.

“It was an open space and it was not designed for a dumpsite,” ni Jerusalem pa.

Paambit niya nga ila na nga gipatawag ang usa ka Edmund Roxas aron pagsumiter ug mga dokumento aron di kini mapahamtangan ug silot.

Si Jerusalem nagkanayon nga atol sa ilang site inspection, ilang nabantyan nga duol lang sa sapa sa Butuanon ang dapit.

Kon wa pa nipasaka ug tukmang reklamo ang mga residente sa dapit, di unta mahibaw an sa CENRO ang operasyon sa pagsige ug labay sa basura sa dapit nga gikatahong nagsugod pa niadtong Enero 22.

Ang maong pasilidad giingong gihimong labayanan sa sagol nga hugaw nga giingong gikan pa sa nasud sa South Korea.

“The classification sa ilang basura is mixed but most are shredded plastic unya foreign letters man ang mga plastics,” matod pa ni Jerusalem.

(ALLAN DEFENSOR) SINAKONG BASURA. Makita sa hulagway ang mga sinakong basura nga giingong gikan sa Korea ang gilabay diha sa bakanting luna sa Barangay Tingub, dakbayan sa Mandaue.