Drugas gipasok sa karne

(Napatik sa Superbalita CDO, Enero 31, 2017)

GISUKSOK sa karneng baboy ang duha ka mga pakite sa gituohang shabu nga nasusihan sa duha sa mga jailguard gikan sa usa ka babaye nga mobisita sa Misamis Oriental Provincial Jail (MOPJ) niadtong niaging adlaw.

Sikop si Vicenta N. Torres, 33, taga Acression, Macabalan ning siyudad kinsa mobisita unta sa usa ka piniriso.

Nasusihan ni Dante Estrada ug Michael Ybanez, pulos mga jailguard sa MOPJ nga dunay gisuksok sa hilaw nga karne nga dala ni Torres.

Matud ni Jail Warden Dominador Tagarda nga kadto untang karne ihatag ni Torres ngadto sa iyang gaduawon nga mao si Loloy Bahian kinsa napriso gumikan sa kasong paghupot gihapon ug gidiling drugas.

Giangkon ni Torres nga kanunay na kini gadala og pagkaon alang kang Bahian ug gihimakak usab niining siya maoy nagsuksok sa gidiling drugas nga nakuha.

Ang gidiling drugas gibana-banang mobalor og P1,000.

Sa pagkakaron ang dinakpan gi- turnover na didto sa Maharlika Detention Cell kinsa gikatakdang mag-atubang og kasong supak sa RA 9165 kon Dangerous Drugs Act. Si Misamis Oriental Gobernador Yevgeny Emano mipaabot sa iyang komendasyon ngadto sa duha ka mga jailguards tungod sa kaabtik nga ilang gipakita ug kaikag nga way bisan unsang kontrabandong makasulod sud sa prisuhan. “Perhaps I can recommend them for a rank higher for a job well done,” matud ni Emano. Gikatakda ipaubos sa imbestigasyon si Bahian ning panahona kinsa mao untay dad-an og gidili nga drugas.