Carreta maoy isunod?

LAING barangay sa dakbayan sa Sugbo ang posibling mahisama sa nahitabo sa Barangay Ermita diin ang tanang mga piniling opisyal nga gipangsuspenso human pasakai og reklamo sa Philippine Drug Enforcement Agency (PDEA) tungod sa giingong wa mokoperar atol sa gipahigayong anti-drug operation.

Si PDEA 7 Director Yogi Filemon Ruiz gusto karon mangayo og katin-awan sa Barangay Carreta kon nganong adunay drug den nga anaa ra sa luyo sa ilang barangay hall nga taod-taod nang nag- operate.

Iyang gibutyag nga wala usab mokoperar ang mga barangay officials sa ilang gihimong buy-bust operation niadtong Pebrero 1 diin usa ka 17 anyos ug laing upat ang nangasikop.

Gibanabanang moabot ngadto sa P100,000 nga kantidad sa shabu ang nasakmit sa pagpangronda.

Matod niya, nga kon dunay mga lig-ong ebidensiya nga makasuporta sa alegasyon dili siya magpanuko sa pagpasaka og kaso niini.

So, di na lang unya ta masurprisa kon duna na usay mga barangay officials nga mangasuspenso sa umaabot nga mga adlaw, kana kon tinud-on ni Ruiz ang iyang gibahad sa maong barangay.

Pero ang makapaikag sa pamahayag ni Ruiz mao ang iyang pagpahibawo nga sa 48 ka mga lowland barangay sa dakbayan, duha ra ang misumiter og mga listahan sa mga drug personalities.

Buot ipasabot nga posibling dunay mga barangay kansang mga opisyal nagprotehir og mga drug personalities o kaha nalambigit sa pagpayuhot sa gidiling drugas.

Pero dili usab nato masalikway ang posibilidad nga way igong pagsalig sa PDEA ang pipila ka mga barangay kapitan tungod sa pagtuo nga atoa kini makapusta sa kaatbang nila sa partido sa pulitika.