Obstruction of justice
NIPASAKAG sumbong si Cebu City Mayor Tomas Osmeña atubangan sa Office of the Ombudsman for the Visayas aron imbestigahon si Presidential Assistant for the Visayas Michael Dino sa kasong “obstruction of justice.”
May kalambigitan kini sa pagtudlo og caretaker sa Barangay Ermita kansang mga opisyales pinangulohan ni Barangay Captain Felicisimo “Imok” Rupinta gipangsuspenso sa Ombudsman tungod sa kapakyas sa pagkooperar sa Philippine Drug Enforcement Agency (PDEA) 7 sa ilang anti-illegal drugs operation.
Si Jonji Gonzales, media liaison officer ni Dino, miingon nga ang maong kaso morag assault sa Malacañang kay si Dino usa man ka alter ego sa Presidente. Matod niya, ang presidente lang ang makatudlo og barangay caretaker. Maayo tingaling tan-awon kon wa ba makahimo ang mayor og usurpation of authority.
Apan ato unang tukion kon unsa kining obstruction of justice. Mga buhat kini nga gisilotan ubos sa Presidential Decree No. 1829, aron pag- discourage sa publiko sa pagpanghilabot ingon man sa di pagpakabana sa pagsikop ug pagkiha niadtong nakahimog mga salaod.
Ang silot sa makalapas niini priso gikan sa upat ka tuig, duha ka buwan ug usa ka adlaw ngadto sa unom ka tuig ( prision correccional in its maximum period) ug multa gikan sa P1,000 ngadto sa P6,000. Kon public official ang sad-an, silotan sab siya sa perpetual disqualification from holding public office.
Gisilotan ning maong balaod kadtong mobabag, mopakyas o molangay sa pagsikop sa mga suspetsado ug sa pag-imbestigar ingon man sa pag- prosecute sa mga kasong kriminal pinaagi ning mosunod:
Pagpugong sa mga testigo sa kasong kriminal o pagtaho sa usa ka krimen o pag-ila sa nakahimo sa krimen pinaagi sa pagsuburno, lansis ug panghulga. Pag-usab, pagdaot, pagtago sa papeles, record, dokumento nga ebidensiya sa usa ka krimen. Pagtago o pagtabang sa pag-eskapo sa tawo nga iyang gituohan nga nakahimog krimen aron di siya masikop, makiha ug makonbikto.
Paggamit og alias aron pagtago sa krimen, paglikay nga makiha o pagpatuman sa hukom sa korte. Paglangan sa pag- prosecute sa kasong kriminal pinaagi sa pagbabag sa pagsilbi sa mga mando sa korte ug pagsamok-samok sa proceedings sa piskaliya ug sa mga hukmanan.
Paghimo, pagpresentar ug paggamit sa mini nga dokumento, record, papeles o ebidensiya aron pagusab sa resulta sa imbestigasyon sa mga kasong kriminal. Pagpangayo, pagdawat ug pag-uyon nga modawat sa bisan unsang benepisyo aron di mosalmot, di mopadayon o mobabag sa pagkiha niadtong nakahimog salaod.
Pagpanghulga sa usa ka tawo sa pagdaot sa iyang dungog ug kabtangan o sakop sa banay aron di moatubang sa usa ka kasong kriminal. Paghatag og sayop o hinimo-himo nga impormasyon aron pagpugong sa mga tinugyanan sa balaod sa pagsikop sa nakahimog krimen.
(Ang atong paghisgut-hisgot mahitungod sa balaud madungog na matag karon ug unya sa mga tampo nga dunay punto legal ngadto sa tulomanon nga “Alang Kanimo Kapuso” nga gisibya gikan sa ala-una ngadto sa alas dos sa hapon sa sibyaan DYSS Superadyo sa RGMA network.)