The way I love you
SAMTANG nagsakay ko og dyip depasaheroan dihang mipauli na ko, si Leo ang nia sa akong hunahuna. Nakita ko sa iyang nawong nga nagmatinud-anon siya sa iyang gisulti nako. Gani, usahay mokarat man ang iyang tutunlan kon mosulti siya, timailhan nga naguol gyud siya ug kahilakon. Kon tinuod ang iyang giingon nga sobra ka selosa si Joy, na, angay ko diay siyang sabton.
Apan bisan na kon wa siya magbakak nako, ang akong simpatiya tua gyud sa akong half-sister. Nahimo kong half-sister si Joy kay ang akong inahan ug ang inahan ni Joy parehas mang
girlfriend kaniadto ni Papa. Parehas silang gidungan sa pagpamabdos ni Papa. Hapit sab mi magkadungan sa pagkatawo si Joy apan namatay si Mama dihangg gipakatawo na ko niya.
Gisagop ko ni Papa, ug ang inahan ni Joy ang gipakaslan ni Papa. Pinangga ko ni Mama Teresa nga inahan ni Joy, giila ko niyang tinuod nga anak. Suod kaayo ang pagbinatiay namo ni Joy. Magtug-anay mi sa among mga problema. Usa ra ka kuwarto ang gikatulgan namo ni Joy.
Nakapanghupaw ko nga naghunahuna aning tanan. Sa sulti ni Joy nako, love gyud niya si Leo.
Naabtan nako si Joy sa sulod sa among kuwarto nga naghigda. Nanghubag intawon ang iyang mga mata sa paghinilak. Gabii na sa akong pag-abot ug diha na sab sa balay sila si Papa Fred ug si Mama Teresa gikan sa tagsa-tagsa ka opisina nga ilang gitrabahoan.
“Wa gyud motawag si Leo nako, Kareen. Wa gani moteks. Nagpasabot lang ni nga tinuod ang akong pagtuo nga uyab to niya ang babaye nga iyang gikaestorya gahapon sa eskol. Sus, loving kaayo sila, uy!”
Kahilakon na sab si Joy. Giduol ko siya. Gihapuhap ko ang iyang buhok. Gusto ko untang tug-anan ang akong half-sister nga nagkasulti mi si Leo. Gusto ko siyang tug-anan nga first degree
cousin ni Leo kadtong girl nga gikaestorya niini. Gusto kong sultihan si Joy sa giingon ni Leo nga subra siya ka selosa. Apan gitago lang una nako kining tanan kay sa tan-aw ko kang Joy, morag naglagot gyud siya kang Leo tungod sa selos. Nagtuo ko nga di motuo si Joy sa giingon ni Leo. “Pasagdi lang una siya, Joy. Sure gyud ko nga makig-estorya ra siya nimo one of these days. Nagpalabay lang tingali siya sa panahon, nakahibawo gud siya nga nasuko ka niya.”
Mihilak na gyud si Joy. (SUMPAYAN)