Problema sa drugas sa brgy. mibalik

GIINGONG nibalik ang problema sa ilegal nga drugas sa kabarangayan human gikuhaan ang kapulisan sa katungod sa paglusad og anti drug operation.

Si Kapitan Ariel Yburan sa Barangay Sawang Calero nga nibisita sa Philippine Drug Enforcement Agency 7 aron iduso ang ngalan sa mga drug personalities sa iyang barangay, nagkanayon nga kasagaran sa mga namaligya sa ilang lugar mga menor de edad.

Ang maong mga menor de edad duna nay record sa ilang barangay nga manglabnihay ug shoplifter sa dagkong mga tindahan sa dalan Colon sa syudad sa Sugbo ug nabilanggo na kaniadto sa Operation Second Chance.

Ang modus sa maong mga bata mao ang sugat-sugat sa pagpamaligya sa ilegal nga drugas niadtong mga kustomer.

“Problema namo karon kay nidaghan. Ang ilang paagi 10 in 1. Kanang makabaligya kag napu, naa kay usa. Kay ang ilang giingon dili daw sila madakop kay minor,” matod ni Yburan.

Dunay kapin sa 50 ka mga ngan sa drug personalities ang iyang giduso ngadto sa PDEA apan kasagaran mga dayo gikan sa mga silingang barangay.

Nisunod sa paghatag sa ilang mga listahan ang barangay Calamba nga gihugpaan usab sa ilegal nga drugas, ilabi na ang sitio A. Lopez.

Si Kapitan Ma. Yvonne Feliciano nagkanayon nga kasagaran sa mga drug pusher sa iyang barangay mga dayo na sanglit ang mga karaan nga personalidad nanglayas samtang ang uban nangadakpan.

“Usahay dili mi ka monitor karon. Unlike before nga identified namo tanan, kay come and go ang mga drug personalities dinhi. Just like sa nahitabo sa Sun Valley nga naay 14 years old, di to siya taga diri (Calamba),” matod ni Feliciano.

Samtang wa una dawata sa PDEA ang listahan nga gihatag unta ni Kapitan Elmer Abella sa Barangay Duljo Fatima tungod kay kinahanglan nga dunay pirma ni Abella aron pagmatuod nga tinuod ang mga pangan nga nasulat.

Giangkon ni Abella nga duna pay nagpabilin nga mga drug player sa iyang barangay apan wala na matod pa, ang mga gaway ni Jeffrey Diaz, alyas Jaguar.

“Wala na ko kabantay nga naa pa ang mga tawo ni Jaguar nga nahabilin sa among barangay,” matod ni Abella.