1 ang angol sa pinusilay

WA madakpi sa kapulisan ang gidudahan nga tulisan ug pusher nga nasamdan human makigengkwentro sa kapolisan sa Cebu City Police Office (CCPO) sa milabayng gabii sulod sa Chinese cemetery sa Sityo Upper, Barangay Carreta, dakbayan sa Sugbo.

Apan ang iyang igsuon nasikop ug nasakmitan og usa ka granada, usa ka kalibre .38 kalibreng revolver, duha ka improvised rifle nga gitawag og lantaka nga may bala nga jolin ug mga bala sa kalibre .38 ug kabhang sa mga bala sa kalibre .45 nga pistola.

Ang nakaeskapo nailhan sa kapulisan nga si Junior Mago samtang ang nadakpan mao ang iyang igsuon nga si Glen Mago, 31, nagpuyo sa lugar.

Ang duha giingong maoy protektor sa mga menor nga manghimo og mga krimen sama sa snatching.

Matod ni Chief Inspector Jacinto Mandal sa Mabolo Police Station nga nakadawat sila og alarma nga adunay nagpabuto og armas sa dapit.

Sa dihang niresponde na ang kapolisan sulod sa sementeryo, kalit silang gipamusil sa mga tawo nga anaa sulod sa mosoleyo.

Nahitabo ang pinusilay tali sa kapulisan ug sa grupo sa mga Mago.

Niasdang ang kapulisan samtang nangikyas ang ilang gikapinusilay.

Apan ang usa niini nga si Glen ilang nadakpan.

Si Junior nga ilang gituohang samdan subay sa nakita nga pat-ak sa dugo sa dapit nga nahitaboan sa pinusilay nakaeskapo.

Matod pa ni Mandal nga ang Mago brothers giila nga bagsik sa ilang dapit.

Giproteksyonan sila sa pipila ka mga residente sulod sa sementeryo.