Valentines sa inmates sa CPDRC mabugnaw?

MABUGNAW ang Valentine’s Day sa mga binilango sa pipila ka mga nagunang bilanggoan sa Sugbo human nipatuman sa hugot nga polisiya sa pagbisita, batok sa pagpasulod sa mobile phones ug ubang gadgets.

CPDRC

Dili maayong balita sa mga piniriso sa Cebu Provincial Detention and Rehabilitation Center (CPDRC) nga buot makakita o makahimamat sa ilang mga mahal sa kinabuhi atol sa Adlaw sa Kasingkasing karong Martes, Pebrero 14, human gideklarar nga “walay dalaw” sa maong adlaw.

Gipasabot sa administrative officer sa CPDRC, Linje Grondiano, ang schedule sa dalaw sa provincial jail gitakda lang gikan sa adlawng Miyerkules hangtud sa adlawng Dominggo ug rest days ang Lunes ug Martes.

Nunot niini, kadtong mga gustong mobisita sa ilang mga asawa o bana nga napriso, mamahimo nang bisitahon daan karong weekend.

Sama sa regular nga mga adlaw sa dalaw, sulod lang 30 minutos lang sila mahimong moduaw. Abril na sa 30 minutos ang posibleng pagpahimulos sa mga conjugal room.

Bisan ug wa’y dalaw sa Valentine’s Day, duna hinuoy kaugalingong kalihukan ang inmates sulod sa prisohan atol sa maong adlaw. Matod ni Grondiano, nihangyo ang mga piniriso nga mopahigayon ug kalingawan ug salusalo.

Dili hinuon ipunon ang mga babaye ug lalaking inmates sa maong adlaw.

CEBU CITY

Hingpit nang idili sulod sa New Cebu City Jail (NCCJ) ang cellphone ug ubang electronic devices ug pagasilotan ang mga tawo nga makalapas.

Si Konsehal Dave Tumulak, chairman sa committee on public order and safety ug deputy mayor for police matters, nipasaka og ordinansa bahin niini.

Base sa balaudnon ni Tumulak nga iyang iduso sa sunod nga regular session, dili na makadala og cellphone, drone ug ubang electronic devices ang mga jail personnel lakip na ang jail warden, dalaw ug piniriso sa tuyo nga kapugngan ang mga ilegal nga kalihukan.

Ang maong mga butang nabutyag gigamit sa mga sindikato aron makapadayon sa ilang operasyon sama sa nahitabo sa New National Bilibid Prison sa dakbayan sa Muntinlupa ug nagbutang sa BJMP nga kontrobersyal.

Ang jail officer ug staff motugyan sa ilang mga gamit ngadto sa personnel nga gitahasan nga moinspeksyon sa mosulod ug mogawas sa pasilidad para sa safe keeping ug makuha ra usab nila kon padulong na silang mopauli gikan sa trabaho.

Ang personnel sa Bureau of Jail Management and Penology (BJMP) ug Philippine National Police (PNP) makahimo og random inspection sulod sa NCCJ.

Kon masakpan nga magdala, sakmiton kini sa awtoridad ug pahamtangan og P5 mil nga multa.

Gawas niini, ang kagamhanan sa dakbayan, pinaagi ni Mayor Tomas Osmeña, naglaraw uisab nga mobutang og signal jammer sa NCCJ aron hingpit nga mawala nag signal sulod sa pasilidad.

TALISAY

Samtang, si Talisay City Jail Warden Chief Indp. Josephus Jelianggao mohangyo ngadto ni Mayor Eduardo Gullas nga mabutangan og signal jammer ang ilang prisohan.

Apan si Mayor Gullas niingon nga wala na kinahanglana ang jammer kon silang mga guwardiya instriktong modili sa pagpasulod sa mga cellphone.

Una niini , si Jelianggao niangkon nga dili malikayan nga adunay makasulod nga cellphone sa ilang pasilidad.