Imahen sa Birhen sa Fatima gidala sulod sa CPDRC
LAKIP ang Cebu Provincial Detention and Rehabilitation Center (CPDRC) sa mga dapit sa Sugbo nga gibisita sa imahen sa Mahal nga Birhen sa Fatima nga gikan sa nasud sa Portugal.
Kini kabahin sa world tour niini, subay sa ika100 na ka tuig nga kasumaran sa aparisyon sa Birheng Maria sa tulo ka mga bata ngadto sa Fatima.
Usa ka santos nga misa ang gipahigayon sa CPDRC quadrangle kagahapon sa buntag agi’g paghangop sa imahen sa Mahal nga Birhen sa Fatima. Gitambungan kini sa mga piniriso ug sa pipila ka mga deboto nga nagpilgrimage aron makitan ang imahen sa Mahal nga Birhen.
Sa pipila ka mga dapit nga duawon sa imahen, nga gikan pa mismo sa Fatima, Portugal, nalakip ang CPDRC, ilabi na kay ang Birehen sa Fatima mao man usab ang patrona diha sa ilang kapilya sa prisohan.
Gihulagway sa administrative officer sa CPDRC, Linje Grondiano, nga dakong tabang ug inspirasyon alang sa mga piniriso ang pagduaw sa imahen sa Our Lady of Fatima diha sa ilang prisohan kay makapaligon man kini sa ilang pagtuo ug ipiritwal nga panginahanglan samtang anaa sa lisud nga sitwasyon.
Ang pagduaw sa imahen sa Birheng Maria sa CPDRC, gihulagway sa usa ka pirso nga nilaya kagahapon nga swerte alang kaniya. Wala na siya mihatag pa sa iyang pangalan tungod sa kasensitibo sa iyang giatubang nga kaso kaniadto.
Na- dismiss na hinuon kini hinungdan nga gawasnon na siya atol sa adlaw nga pagduaw sa Mahal nga Birhen ug mapasalamaton siya niini.
Nagpabilin sa CPDRC hangtud kagahapon sa udto ang imahen sa Our Lady of Fatima. Human niini, nibiyahe na usab kini paingon sa Barili ug ugmang adlawa, adto na sab kini sa Toledo City.
Kini kabahin sa iyang world tour nunot sa ika100 nga sumad sa aparisyon sa Birhen.