Tinun-an nga babaye nakapatay og 100 ka ISIS
USA ka tinun-an gikan sa Denmark niundang sa iyang pagtuon aron makig-away sa ISIS nagtuo nga may $1 milyones ang patong sa iyang ulo kay gikonsiderar siyang terorista sa ilang dapit.
Si Joanna Palani nangangkon nga nakapatay na siyag 100 ka mga militante atol sa iyang pakigaway didto sa Iraq ug Syria isip usa ka sniper.
Matod ni Palani nga gikutlo sa Mirror News nga iyang gibuhian ang grupo sa mga kababayen-an nga gihimong mga “sex slaves” sa ISIS ug iyang gitudloan nga mahimong sundawo unya mosukol.
Kining 22 anyos nga babaye nga may kaliwat gikan sa Iranian-Kurdish ug iyang amahan ug apohan pulos mga Peshmerga fighters.
Natawo siya sa UN refugee camp una siya ningadto sa Copenhagen dihang bata pa siya ug nakat-on sa pagpabuto og armas dihang nuybe anyos pa siya.
Apan, nahimong problema dihang nahibalik siya sa ilang dapit human sa iyang gipanghimo batok sa ISIS.
“I was willing to give up my life and my freedom to stop ISIS advancing, so that everyone in Europe can be safe. This was my choice. But I am seen as a terrorist by my own country,” butyag niya.
Nitataw siya nga anaa siya nagpuyo sa usa sa mga nindot nga nasod sa kalibutan apan gigutom ug wa siyay balay unya mabugnawan panahon sa kagabhion samtang wa siyay gisaligan nga mga tawo.
Si Palani namahayag nga dihang nakiggubat siya sa mga ISIS, nanghambog siya nga sayon ra kaayo kini pamatyon.
“ISIS fighters are very easy to kill,” matod niya.
Iyang gipadayag nga ang mga ISIS fighter maayo nga mosakripisyon sa ilang kinabuhi apan ang mga sundawo ni Assad maayong pagkabansay ug gihulagway niyang mga “specialist killing machines”.