Pagpukaw sa pagbati
MATAG Pebrero katorse, dili makatulog akong adlaw kung wa koy madawat nga surprising buwak o gasa gikan sa akong mga kaluha sukad sila nakamatngon og buot.
Dihay higayon nga dili nako malimtan kay pwerting hangyo ngadto sa nanindahay og buwak, siyete anyos pa ilang pangidaron, kay kuwang ang ilang natigom para ipalit. Tungod sa kahimuot, iyang gipakapinan og usa ka pongpong nga puwang rosas.
Nagtuo ko nga sa ilang pagdako, hinay-hinay kining molubad labi na kay nakakita naman og mga pares nga nakapapitik sa ilang dughan maong akong gi-andam akong kaugalingon nga sa dili madugay ma ‘back stage’ na ko. Apan puwera buyag, hangtod karon nga 21 anyos na sila, padayon pa gihapon ilang pagdumdom ug paghatag og buwak ug mainitong pahalipay.
Kinsa may inahan nga dili malubag ang kasingkasing o mahimuot kong makahinumdom og ingon ini kanindot og tam-is nga kasinatian?
Karong uma-abot nga Valentines Day, nangayo ko og mga suhistiyon sa akong mga higala kung unsay maayong igasa o ihatag nga makapalipay sa mga minahal ma asawa, bana, uyab, ginikanan, magtutudlo og uban pa nga dili kaayo gasto.
Dunay misugyot pagbalik sa kinaraang pagsuwat og kinamot nga Love Letter gamit ang kaugalingong pulong, huna-huna ug agi. Bisag moderno na ang teknolohiya karon, segurado ko nga daghan pa gihapon ang mahimuot kung makadawat ini.
Usa sa akong mga higala nagpalahi kay naghimo siya og picture collage diin iyang gipang kulikta ang tanang mga maanindot nga hulagway sa ilang tamis nga kagahapon nga maoy nakapapukaw sa ilang duhang pagbati.
Ang usa sab nako ka higala nga dili kaayo maayong mosuwat nagpalit og usa ka dosenang rosas. Ang kanindot kay kada pungango ini iyang gipabitayan og mga gagmay nga puwang papel nga dunay iyang kinupyang mga pulong sa gugma. Para nako mas nindot kung ang isuwat sa cards ang mga maayong hiyas o pulong pasalamat sa imong hatagan.
Way makatupong sa lutong- bahay maong karong Valentines Day, i-surprisa imong minahal sa imong espisyal nga nilutong putahi o pastries sama sa cake o cookies nga dunay puwang icing nga porma og kasing-kasing. Gawas nga kini tam-is ug lamian, lahi kini sa uban kay gipangunayan man og gama sa kamot sa nagpangga.
Pahati og panahon imong hinigugma nga makalaag nga kamo rang duha para makalingkawas sa inadlaw ug naandang ginbuhaton sama sa pagtan-aw og sine, concert, kaon sa gawas o overnight stay sa maanindot nga lugar.
Dili tanang materyal nga butang o gasa nga mapalit ang makapalagsik sa kasing-kasing kundi ang tim-os nga pagmahal ug tinu-uray nga paghigugma.
Kanimo, Happy Valentines!