Hudlat ni Osmeña sa BDO

DUNAY punto si Cebu City Mayor Tomas Osmeña niining iyang pamahayag nga ang pagprotehir sa dakbayan sa Sugbo nga dili matikasan sa mga kompaniya sa pagbayad og saktong buhis maoy usa sa iya usab nga tutokan.

Kini maoy iyang perming irason sa higayon nga mahisgutan ang isyu kalabot sa iyang laraw karon sa pagpasira sa mga sangang buhatan sa Banco de Oro nga nahimutang sa syudad.

Adunay 26 ka mga branches ang maong banko nga ania sa dakbayan nga matod pa sa taho, kansang business permit wala i- renew ug pabiling anaa pa sa buhatan sa mayor.

Kini human gialegahan ni Osmeña nga ang BDO Magallanes branch wa motarong og bayad sa ilang buhis.

Sa wa pa molarga si Cebu City Mayor Tomas Osmeña paingon sa Japan, nibahad na kining daan nga ang pagpasira niining mga bankoha iyang himuon sa iyang paghibalik na unya sa Sugbo.

Kini maoy makapaduda kon makapasira ba kaha gyud ang mayor sa maong mga banko. Ang iyang mga abogado sayod niini nga dili kini madali-dali nga buhaton.

Ubos sa balaod moagi pa una og daghang proseso ilabi na sa legalidad ang pagpasira og kompaniya? Tukion una og maayo kon haom ba gyud ang basehan niini.

Kon ang BDO-Magallanes branch nga mao lay iyang kapasikaran ug gitumbok sa alegasyon nga nanikas sa pagbayad sa buhis, nganong ilakip man niya ang ubang mga branches niini?

Sa gikaingon na nato sa unahan, ang pagpanggukod niadtong mga kompaniya nga tikasan sa gobiyerno maoy usa ka programa nga angayan lang suportahan, apan kinahanglan ipaagi kini sa patas, saktong proseso ug makiangayon nga pag-implementar.