Oplan Pokemon

KAPULISAN sa Cebu City Police Office nanghingusog karon sa usa ka operasyon nga ilang gitawag ug Oplan Pokemon. Bisan niadtong panahon nga diha pa ang Project Tokhang, ang Oplan Pokemon nagpakita na sa iyang ka agresibo sukad kini gilusad sa pangulo sa CCPO nga si Sr. Supt. Joel Doria. Mao ni ang gitutukan karon sa kapulisan sa dakbayan sa Sugbo human gisuspenso ni Presidente Duterte ang operasyon sa iligal nga drugas sa kapulisan. Sa uwahing operasyon sa Oplan Pokemon niadtong Huwebes sa hapon 73 ka tawo ang ilang nasikop ubos sa 11 ka police stations sa dakbayan. Kinse ka tawo gisikop kay nakalapas sa Republic Act 9165 kun paghupot ug iligal nga drugas. Bisan kung wala na ang Project Tokhang ug Oplan Double Barrel matod sa CCPO na aktuhan sila nga naghupot sa makayabag nga butang. Laing 10 ka suspek nasikop tungod kay nakalapas sa Republic Act 9287. Traynta y nuebe ka suspek nasignit tungod sa kalapasan sa Presidential Decree 1602. Unom gidakop kay nakalapas sa Republic Act 10591. Duha gidakop tungod kay may Warrant of Arrest sa kasong robbery. Usa tungod sa kalapasan sa Batas Pambansa Bilang 6. Laing usa gidakop sa kasong pagpangawat. Atol sa operasyon lima ka .38 caliber revolver ug duha ka hand grenade ang nasakmit.

KORTE

Nakasabot ko sa gibati sa mga dinakpan ug sa ilang pamilya taliwala ning maong kaugmaran. Kadtong niingon nga inosente sila sa pasangil kini ilang pamatud-an sa korte. Makadaghan naman gud ta makadungog nga dunay mga operasyon ang kapulisan nga gilaktod lang. Kung dunay ebedensiya pagkunbinsir sa Prosecutor’s Office nga masang-at ang kaso sa korte tubagon kini sa mga hingtungdan. Moagi man gyud ug proseso. Duna tay mga kaila nga mga imbestigador nga moingon sayon ra ang pagpanakop pero ang pagpalig-on sa kaso mas lisod. Way gusto nga sa piskaliya pa lang mabasura na ang kaso. Diha bitaw to’y nasuroy nga pulis nga taga Sugbo apan tua magserbisyo sa Chicago Police Department. Nangutana ko kung unsay dakong hagit sa iyang pagka pulis sa maong dapit. Ang iyang giingon mao ang pagtaral gyud sa iyang dinakpan sa hukmanan. Matod niya estrikto kaayo ang pamulis didto. Mao ang iyang gikahadlokan kanunay kanang di makabarug ang kaso tungod sa kakuwang sa ebedensiya ug testigo. Parehas ra ni dinhi sa ato. Mao bitaw nga ang mga pulis kutob sa mahimo mohangyo gyud sa mga testigo pagtabang pinaagi sa pag pirma ug affidavit nga mopalig-on sa kaso. Dunay daghan nga nahibalo o may deriktang kasayuran sa usa ka kaso apan kung patistiguson na gani mobalibad tungod sa daghang rason. Usa na niini ang ilang siguridad. Ang uban hasolan kay maapektuhan ang ilang trabaho. Ang uban sab hinuon way duha-duha nga moboluntaryo pag testigo hangtod makonbikto ang akusado. Pero duna sa’y uban nga di kalahutay tungod sa nagka daiyang rason mo- withdraw sa pagka testigo.