The way I love you

Ni OLIVER P. FLORES (Ikaupat sa pito ka mga gula)

NAGKITA

mi si Leo sa suki namong karenderya para sa among pagpaniudto. Naghilom siya samtang nagkaon mi. Nagduko siya, klaro nga duna siyay gihunahuna. Miinom ko sa akong sofrtdrnks. Pagkahuman nangigham ko. Mitan-aw si Leo nako.

“Wa na ko maglagot nimo, Leo. Pero naluoy ko sa akong half-sister. Nagsige siyag hilak. Bisitahi siya aron malipay.” “Pero nasuko man siya nako? Atubangon kaha ko niya?” “Wa na siya masuko nimo, uy. iya man gani kong giingnan nga gimingaw siya nimo.” Wa mausab ang reaksyon ni Leo. Guol gihapon ang iyang nawong. “Mausab pa kaha siya, Kareen? I mean, ang iyang kinaiya ba. Wa man siyay pagsalig nako. Grabe gyud siya ka selosa.”

“Aw, estoryahi gud siya bahin ana. Pasabta siya. Pangutan-a siya kon tinud-anay ba gyud ang iyang pagmahal nimo. Aw, kon tinud-anay, makasabot gyud siya.”

“Suwayan ko nang imong giingon, Kareen. Frankly, gipasagdan ko man lang siya anang iyang pagka abubhoan. Wa man lang ko mokomentaryo niya ana.”

“Mao nang naanad siya. You know, Leo, angay gyud mong mag-estorya pag-ayo bahin anang imong giingon. Sa tan-aw ko nimo ron, naproblema gyud ka sa giingon mong pagka selosa ni Joy.”

“Sakto gyud ka, Kareen. Naproblema gyud ko ani, uy. Nahunahuna man gud nako nga unsa kahay mahimong sitwasyon sa among panagpuyo kon kami gyud ang magkadayon someday? Di kaha gubot kaayo? Way duha-duha kanunay gyud ming mag-away.” Mihilom ko. Mipadayon ko pagkaon. “Gubot molang!” Nakaingon ko sa hilom. Gipasiplatan ko si Leo. Naghinuktok siya. Wa na siya mokaon. Aw, kinsa man say ganahang mokaon kon naghatag og problema ang gikarelasyon?

“Sagdi lang gud, Leo. Makasabot ra lagi si Joy. Unsa man, mamisita ka niya unyang gabii? Sultihan ko siya.”

Mitando si Leo. Nakapahiyom ko. Apan si Leo, morag way gusto nga mamisita sa akong half-sister. Mipakibo na lang ko sa akong mga abaga.

Puwerteng lipaya ni Joy dihang gisultihan ko siya sa gisaad ni Leo nianang pagpauli ko na gikan sa eskol. Nag-una ang akong half-sister sa pag-abot sa among balay. Naligo dayon siya. Sus, ka-excited gyud sa akong half-sister, uy! Nakaingon ko sa akong kaugalingon.

Pagkahuman namog panihapon, wa madugay nahiabot si Leo. Nagdala siyag usa ka pungpong nga rosas. Puwa ang kolor. Aw, hapit na man sab ang Valentines day. Asa kaha mag-date ning duha, no, sa maong adlaw?

Unya migawas si Joy sa iyang kuwarto. Puwerte niyang humota.