4 ka Sugboanon apil sa Nat’l Arnis board

UPAT ka mga Sugbuanon ang mahilakip sa National Board sa bag-ong Arnis federation nga giporma ni senador Miguel Zubiri.

Nahilakip niini si Gerald Cañete sa Doce Pares International, kinsa magrepresentar sa labing dakong Arnis club sa nasod.

Naa sab sab si Borbon mayor Butch Sepulveda, kinsa adunay grandmaster rank sa Balintawak Eskrima Federation.

Ikauban nila ni Cañete ug Sepulveda mao sila si GM Felipe “Tyke” Abella Jr. sa Lapunti Arnis de Abanico ug Danilo Jorquia, kinsa eksperto sab sa Eskrima de Abanico. Sila si Abella Jr. ug Jorquia pulos 10th Grade GM sa Filipino Martial Arts.

“These are the names that were highly recommended to the board. I am also lobbying for one more director from Mindanao because only one was elected from there and to think Mindanao is a big island,” matod ni Cañete sa pagpakighinabi sa Sun.Star Cebu, igsuong buhatan ning mantalaan.

Gawas sa mga Sugbuanon, naapil sab sa grupo sila si Master Ike Xavier Villaflores sa Dumaguete City ug Master Efren Apresto sa Cotabato City.

Sa sayo pa, nagkanayon si Cañete nga 12 gikan sa Luzon ang naa sa listahan hinungdan nga mireklamo siya niini hinungdan nga nakakuha siya og dugang luna alang sa Vis-Min.

Sa laing bahin si Supreme Grand Master Dionisio Cañete, amahan ni Gerald Cañete, gilaumang ihiluna isip committee head.