CAVALIERS NABUNGOG
Westbrook mirehistro sa iyang ika-26 nga triple-double sa kadaugan sa Thunder
GIMUGNA ni Russell Westbrook ang iyang ika-26 nga triple-double sa season aron pangulohan ang host Oklahoma City Thunder sa pagputol sa tulo ka sunodsunod nga kadaugan sa Cleveland Cavaliers, 118-109, kagahapon sa National Basketball Association (NBA).
Nagpakatap si Westbrook og 29 puntos, walo niini iyang gimugna sa 4th quarter, 12 ka rebounds ug 11 ka assists lakip na niini ang duha ka mga krusyal nga pasa sa hinapos nga bahin.
Ning puntoha, nakatabla si Westbrook sa rekord ni Oscar Robertson sa ikatulong dapit sa padaghanay og triple-double sa usa ka season sa kasaysayan sa NBA.
Sa kinatibuk-ang duwa, nasugakod sa Thunder ang ubay-ubay nga mga rally nga namugans a Cavaliers.
Sa wala pa nagsugod ang duwa, gikonsiderar ni Cavaliers coach Tyronn Lue nga papahuwayon ang iyang Big Three nga sila si LeBron James, Kyrie Irving ug Kevin Love human sa ilang kadaugan batok sa Indiana Pacers, 132-117, sa miaging adlaw.
Apan nausab ang hunahuna ni Lue, iyang gipaduwa ang tulo niya ka mga sinaligan ug ningsugod kini sa kombati.
“There was a lot of drama going on before the game,” matod ni Thunder coach Billy Donovan. “Who’s playing? Who’s not playing. They’re in. They’re out.”
Giklaro ni Donovan nga iyang gipahimangnuan ang iyang mga batos nga bisa’g kinsa pa ang ilang ikaharong, kinahanglang magtutok sila sa angayan nilang pagabuhaton. “I just really told our guys, even in shootaround this morning, it’s about what we need to do and we need to understand personnel like we do for every scout.”
Ang Cavaliers gipangulohan ni Irving pinaagi sa iyang 28 puntos, nidugang og 18 puntos si James samtang nitampo og 15 puntos ug 12 rebounds si Love.
“It was good to go through something tough,” pasabot ni Lue. “It was a tough game for us. Four games in six nights, and it was good to fight through and not give in, so our guys came out and played. I liked how we competed.”
Ang Cavaliers ningbuntog sa New York Knicks, Washington Wizards ug Pacers sa wala pa sila moasdang sa balwarte sa Thunder.
“We would have loved to be 4-0, but coming off a back-to-back, you know they gave us everything they had,” batbat ni James.
“We go home extremely proud of what we did on this road trip.”
Si Victor Oladipo nidugang og 23 puntos alang sa Thunder samtang nitunol og 20 puntos ug 13 rebounds si Steven Adams.