Pamilya sa masuso nga gi-rape gitabangan

NIHATAG og financial assistance ang Office of the President ngadto sa pamilya sa upat ka buwan nga masuso nga gi-rape sa dakbayan sa Carcar.

Mismo si Presidential Assistant for the Visayas Michael Dino ang nitunol niini sa pamilya sa biktima kagahapon sa alas 11:00 sa buntag atol sa pagbisita niya sa tambalanan diin na-admit ang bata.

Matod ni Dino kinsa nahinabi sa Superbalita

Cebu kagahapon nga masulob-on nga panghitabo nga aduna’y tawo nga makabuhat niini sa usa ka upat ka buwan nga bata.

“Sakit kaayo sa akong dughan. Of course tabangan nato ang pamilya because siyam kabuok iyang anak,” si Dino mihulagway.

Dugang niya nga angay lang nga ibalik ang death penalty sa mga insidente sa krimen nga ingon ani.

Mokabat sa P10,000 nga financial assistance ang gitunol sa buhatan ni Dino nga OPAV gikan sa Office of the President.

Samtang ang Carcar City government nitunol usab og hinabang ngadto sa pamilya.

Matod sa tigpamaba niini nga si Candice Acuña nga niadtong Biyernes dihang gitunolan nila og usa ka sako nga bugas ug goodies, lakip ang financial assistance alang sa pamilya.

Dugang ni Acuña nga pursigido usab si Mayor Nice Apura nga motabang sa pamilya sa pagpasaka og kaso batok kang Jonathan Marfe nga natanggong karon sa prisohan.

Kagahapon, nakagawas na usab ang bata sa tambalanan diin inubanan sa inahan ug duha ka igsuon niini gidala una sa Department of Social Welfare and Development (DSWD) residential center for temporary shelter.

Aduna’y social worker usab nga moadto sa Carcar aron i-assess ang ubang igsuon sa bata.