Panginahanglan sa tubig taas, supply kuwang
DAKO ang kuwang sa supply sa tubig sa Metro Cebu Water District kon itandi sa panginahanglan karon sa mga konsumidor sa Metro Cebu.
Kini ang gibutyag ni Chairman Joel Marie Yu, sa MCWD board, usa ka buwan human siya nihulip kang Rene Mercado, kinsa padayon nga nagserbisyo isip vice-chairman.
“Ang sitwasyon ron is the demand of water is very much higher than the availability of MCWD to supply water. Kuwang kaayo atong tubig,” matod ni Yu.
Gitumbok nga rason sa bag-ong chairman sa MCWD mao ang kusog nga pagsaka sa gidaghanon sa mga kompaniya nga nagbase sa ilang franchise area.
Kini sama business process outsourcing (BPO) o call centers, katukoran sa mga subdivision ug tag-as nga mga building sama sa condominium units sa milabay nga lima ka tuig.
Laing rason nga gitumbok ni Yu mao ang pagnihit sa supply sa tubig sa Cebu.
Iyang giangkon nga labing dako nga problema karon nga ilang giatubang mao ang pagkunhod sa gidaghanon sa tubig gikan sa ilawom sa yuta.
Gibanabana nila nga niabot na og 20,000 cubic meters ang nawagtang matag adlaw sa nilabay nga tulo ka tuig.
Laing problema nga ila karon nga gipangitaan og kasulbaran mao ang pag-ayo sa Jaclopan dam nga iyang gihulagway nga di na maayo kaayo ang agas gumikan sa daghang yuta, balas nga nisulod sa dam.
Ang pag-ayo niini nagkinahanglan og igo nga pundo ug panahon.
Gawas niini, iyang gihulagway nga kutob ra sa estorya ang gagmay nga private suppliers sa MCWD nga ilang giimbitar nga pasuplayon og tubig sanglit sa higayon nga ila kining pangayuan sa ilang mga plano, way ikaduso.
Lakip sa ilang plano mao ang paggamit sa surface water gikan sa Mananga, Lusaran-Kotkot river apan walay proposal nga gihatag didto sa ilang buhatan.
Matod ni Yu nga ang labaw niyang gikahadlokan kon adunay taas nga lanat sa El Niño karong summer ug mag-anam og kahinay ang tubod nga posibleng ikanihit sa tubig.
Gihulagway niya nga ang ilang paningkamot giubanan og pangaliya nga dili unta taas ang lahutay sa ting-init aron makalingkawas sa kanihit sa tubig ang MCWD.