Valentine’s Day buot himuong Nat’l Family Day ni Kong. Abellanosa
NAGTINGUHA si Cebu City South District Congressman Rodrigo “Bebot” Abellanosa nga madeklarar ang Pebrero 14 matag tuig nga special non-working day nga pagatawgon na og National Family Day.
Si Abellanosa niduso og House Bill No. 4845 niadtong Enero 25 sa House of Representatives nga giaprobahan na sa unang pagbasa.
Ipatawag ang nagkalainlaing ahensiya sa gobiyerno, pribadong sektor ug academe aron mapaligon pa ang maong balaudnon.
Ang kongresista sa South District nagkanayon nga ang Pebrero 14 saulogon isip adlaw sa gugma apan iyang gipadayag nga pinaagi sa HB 4845 mapalapdan pa ang kahulogan sa gugma nga nakasentro sa managuyab.
Gipasabot niya nga pinaagi niini, ang pamilya mahiusa ug mapadayag ang gugma sa usagusa sanglit walay trabaho ang mga buhatan sa gobiyerno, private sector.
Kon mahukom nga patrabahuon ang ilang empleyado, ang mga mamumuo adunay 30 porsiyento nga usbaw sa ilang inadlaw nga suholan.
Gibutyag ni Abellanosa nga ang pamilya maoy sentro sa kalambuan ug gikonsidera nga sa pamilya magsugod ang kaligon ug panaghiusa sa nasod.
Matod sa kongresista nga dako og ikatabang ang pamilya ug iyang gikuhaan og sanglitanan ang gihingusgan nga kampanya ni Presidente Rodrigo Duterte diin libuan na ka mga tawo ang nangamtay gumikan sa illegan nga druga.
Gipadayag niya nga kon nasubay pa sa hustong dalan ang mga nagumon sa ginadiling drugas, wala untay mga kinabuhi nga nakalas ug wala untay mga tawo nga nadaot gumikan sa dautang bisyo sanglit nahatagan sila og husto nga giya ug natudloan sa maayong values.
“The National Family Day shall celebrate and strengthen the family unit’s contributions to nation building and shall aim to remind Filipinos of its rights, capabilities and responsibilities,” tipik sa HB 4845 ni Abellanosa.