Tomas ug BDO

IPADAYON ni Mayor Tomas Osmeña ang plano niini nga ipasirado ang Magallanes branch sa Banco de Oro tungod sa kaubos sa gibayad nga buhis alang sa pagnegusyo dinhi sa Syudad sa Sugbo.

Nagkanayon ang mayor nga bale og P6 lang matag adlaw ang kantidad sa buhis nga gibayad sa BDO. Mas mahal pa ang income tax sa usa ka janitor sa City Hall nga mobayad og P5,000 sa income tax matag tuig.

Ang labing adunahan nga banko sa nasud nga mao ang BDO, dunay branch nga igo lang mobayad og P2,000 matag tuig.

Tungod niini, makaingon ko nga sakto lang kining pasirad-an ang maong banko. Bahala nag magsigig pangugat ang mga dapig sa maong banko kay makadaot sa negusyo.

Di daw makiangayon nga pasirad-an ang labing adunahan nga banko nga gipanagiya sa tag-iya sa SM, matod pa.

Bisan og mobayad lang sila og P2 mil matag tuig? Alang kanako, isarado na mayor.

BASURA

Naglisud man gani kita sa pagpangitag kalabayan sa atong basura dinhi sa Syudad sa Sugbo, gisamotan pa kita niining basura nga gikan sa South Korea. Sakto lang nga ibalik kini dayon didto sa ilaha.

Sakto lang kining desisyonni BOC Cebu District Collector Elvira Cruz nga ipabalik kini dayon human naisyuhan og warrant of seizure and detention (WSD).

Bisan pa man, sakto sab kiing pamahayag ni Atty. Noel Felongco, undersecretary sa DENR, nga angay lang gukdon kining nagpaluyo sa maong kargamento.

Sa atong nasayran, ang consignee sa maong kargamento mao ang Moving Forward Global Trading Inc. Ako lang i- clarify nga di diay duha ang consignee. Kining maong ahensiya naa man diay nag-opisina sa Robinland.

Karon, atong nasayran nga gamhanan kaayo kining maong ahensiya. Lalim bay wala maugma-i ang pagproseso sa maong gidiling kargamento nga usa ka barkohan.

In fairness sa taga Bureau of Customs hinuon, atong nasayran nga didto pa lang sa Port of Origin, gi- certify na nga wood chips ug raisins kini. Kon mao man ang gideklarar sa LPSR, lisud na kon gikutikuti pa kini sa bureau.

Maayo na lang gyud, sukwahi sa duha ka naunang kargamento nga gipalit sa usa ka pabrika sa Syudad sa Naga, kining maong kargamento nasakpan diha sa Syudad sa Mandaue kay nanimaho na.

Alang kanako, angay lang nga kining maong kargamento ibalik na sa South Korea kay angayan lang unahon ang panglawas sa katawhan.

PANGLAWAS

Sukad nakaangkon ko usa ka smartphone pipila ka tuig nga milabay, naanad na kitang mogamit niining gitawag og mga apps ug ang social media.

Lakip na niini mao kining lain laing mga apps nga kabahin sa panglawas. Hinuon, wa ko ni panumbalinga bisan pa man sa pag- introduce niini sa akong usa ka anak nga hilig og pag-ateman sa iyang panglawas. Buot ipasabot, conscious kaayo kabahin sa pagkaon ug pag- exercise.

Diha na ko nakainteres niining health app dihang nadownload nako kining ginganlan og Vitality App nga giingong hinimo og Pinoy.

Tuod man, nag- monitor na ko kabahin sa akong physical activity ginamit ang maong app nga tipik sa “Live Better” kampanya karon sa Phil-Am Life. Alang man gud sa maong insurance company, tipik na sa financial planning ang healthy living.

Okay. Tan-awon nato kon kining usa ka baby boomer makasustiner ba sa usa ka personal nga kalihokan matag adlaw nga gibuhat og mga giingong millennial.