The way I love you
(Ikalima sa pito ka mga gula) SA
tan-aw ko kang Joy morag kagaksunon gyud siya kang Leo. Nindot kaayo siyag pahiyom dihang gidawat na niya ang pungpong sa mga rosas nga gitunol kaniya ni Leo. Sa tanaw ko sab kang Leo, morag alang-alang malipayon ug alang-alang sab magul-anon ang iyang nawong. Tingali, naa pa sa iyang hunahuna ang pagka selosa ni Joy.
Nagkuptanay sila sa kamot nga nagtupad paglingkod sa taas nga sopa sa sala. Mibiya ko nila ug misulod ko sa among kuwarto ni Joy. Nagbasa-basa ko sa mga libro sa akong mga subjects pagka ugma. Nagtuon ko sa akong mga klase. Unya giasikaso ko ang akong assignments sa eskol.
Pagkahuman kog atiman sa akong assignments, mihigda na ko sa kama. Katulgon na ko. Hapit na gyud ko makatulog dihang misulod si Joy. Malipayon kaayo siya. Nagkanta-kanta pa. Milingkod siya sa ngilit sa gihigdaan kong kama. “Peace na gyud mi si Leo, Kareen. Kamalipayon ko karon, uy.” Mikidhat si Joy nako. Mibangon ko ug misandig sa headboard sa kama. Gipahiyoman ko sab ang akong half-sister. Gipakita ko niya nga gisuportaran ko siya sa iyang kalipay ron.
“Di na gyud nako awayon si Leo, uy, Kareen. Di man diay niya uyab tong girl nga iyang gikauban. First degree cousin diay to niya. Puwerte gyung sayopa sa akong pagtuo.”
“Mao lagi, Joy. Ayaw dayon hukmi si Leo kon unsa man ang imong makita niya. Kontrola nang imong kaselosa.”
“Di lang gyud nako ni kapugngan, Kareen. Tingali, tungod sa dako kong love kang Leo, magselos dayon ko kon makita ko siyang dunay gikaestoryang girl.”
“Na, kon magpadayon ka anang imong kinaiya ngadto kang Leo, mawa’a na gyud siya sa hingpit nimo, Joy.” “Simbako uroy, Kareen. Gisayun-sayon lang na nimog sulti nako, no?” Kalit nga miseryuso si Joy. Nahikatawa kog kusog. Nahimuot ko sa iyang reaksyon.
“Da, nanimbako ka lagi. Naa ra gyud nimo ang problema, Joy. Kon gusto kang ma- forever ang inyong pagminahalay ni Leo, ayaw na siyag selosi. Salig niyag one hundred percent.” Nangawot sa ulo si Joy. “Ambot, uy, Kareen, kon makasunod ba ko anang imong giingon. Di man gud ko gusto nga dunay laing babaye nga tagaan ni Leo sa iyang panahon. Selfish na kon selfish. Basta mao gyud nay akong bation sa matag higayon nga dunay gikaestoryang laing girl ang akong boyfriend.”
Nakapanglingo na lang ko. Giagda ko si Joy nga mangatulog na mi.