Hinumdomi ni aron di ka masipyat pagpalit og 2nd hand gadget
Kadaghanan mahiligon kaayo nga mopalit sa second hand nga mga butang sama sa mga gadget tungod kay gawas nga barato ra itandi sa original nga presyo, lig-on pa kini ug branded.
Apan usahay di malikayan nga adunay mga mapahimuslanon sa higayon nga og magdali-dali og baligya sa ilang mga butang tungod kay aduna sila’y nakita nga gamay nga deperensya sa ilang gadgets ug kon dili mabantayan sa mopalit, mabiktima gyud.
Busa adunay gamay nga mga pahimangno o pamaagi kon unsaon pag-ila sa 2nd hand gadgets nga sigurado nga maayo pa ug way depekto ug basin makatabang pa kini: 1. Mas maayong magdouble check sa gadget
Dili basihan ang nindot ug maayo nga hitsura sa gadget tungod kay kasagaran sa tawo dali kaayo nga mahaylo sa nindot nga mga butang labi na kon bag-o nga tan-awon. Mas maayo nga bali-balihon og tan-aw ilabi na kon celfone, testingan kon maka-text ba, maka-receive og text, calls, maka mobile data ba, madungog raba ang tingog kon adunay manawag, mic sa celfone maayo ba, ang headset, saksakanan sa charger, ang battery kon bag-o pa ba, ug anaa pa pa ang sticker sa luyo nga gibutang sa screw timailhan nga wala pa na abli. 2. Sa cell phone, tan-awon ang ang Regulatory Information
Kon cell phone, mas maayo nga tan-awon ang regulatory information nga naa nahimotang sa settings sa “about phone” tungod kay makita kon asa siya gihimo ug mga ilhanan nga branded ang gadget nga napili. Sa imong pag tan-aw niini ihapit na lang sab pag tan-aw pinaagi sa pag-click sa makadaghan nga higayon ang android version nga anaa nahimotang ubos sa regulatory information aron sa pagsuta kon tinuod ba nga android. Apan magdependi kini sa klase. Kon dili gani mag response, dilikado nga
peke ang maong gadget. 3. Tan-awon ang sticker kon branded ba kini
Aron sa pagsuta nga branded ang maong gadget, mas maayo nga tan-awon usab ang sticker nga nakaattached sa gadget. Magmabinantayon usab sa pag-check sa sticker tungod kay ang mga peke nga maayo kaayo nga pagkasunod sa original ug gamay lang ang kalainan niini. 4. Ayaw pagdali-dali og palit sa gadgets sa daplin-daplin
Kadaghanan sa mga nailad mao ang nipalit lang og gadget sa daplin-daplin ug gipasaligan nga bag-o pa kaayo ug walay deperensya. Dili man hinoon tanan apan mas daghan ang mga mangingilad kaysa nagtinarong mao nga aron sa pagseguro nga maayo ug dili peke kon mahiligon mopalit og 2nd hand gadget, adto sa mga mall, kanang adunay tindahan nga dali nga matultulan dili ang suroy aron kon adunay guba nga wala nabantayan, mabalik pa kini ug masulbad ang problema.
5. Kon mahimo pili-a ang adunay warranty
Kasagaran sa mga 2nd hand nga mga gadget wala nay warranty mao nga magmabinantayon. Apan adunay panagsa pa nga mohatag gihapon sila og warranty bisan 2nd hand mao nga mas maayo nga pili-on ang adunay warranty aron ko adunay guba, mabalik pa kini. Niño B. Baldevino USJ-R B.A. Communication Intern