Valentines 10-ball naa’y raffle

ARON paghatag og dugang kaikag, adunay libre nga re-entry fee alang sa duha ka mga partisipante sa matag elimination round sa Valentines Challenge Cup 10Ball tournament nga sugdan karong Pebrero 14 diha sa Kiosk 8Ball Biliard Hall sa Osmena Boulevard, dakbayan sa Sugbo.

Kini ipaagi sa raffle draw sa mga partisipante nianang adlawa. Hinuon ang moqualify kadto lang sayo nga makaparehistro ug kadto ra usab nga anaa na sa venue gikan sa alas 6 sa hapon hangtod sa alas 8 sa gabii.

Dili pa man tuod kompirmado, apan posibli nga motambong si world boxing champion Donnie “Ahas” Nietes, usa sa mga dinapit ug posibling mao mohimo sa ceremonial break. Imbitado usab si Cebu City councilor Jerry Guardo.

Ang torneyo nga salmotan sa lokal nga mga tirador sa Sugbo ug sa silingang mga dapit mosunod sa naandan nga format diin himuon ang upat ka adlaw nga elimination round karong Pebrero 14, 15, 16 ug 17. Ang Top 16 ug championship game duwaon sa petsa 18.

Ang top four sa matag elimination series mao ang moqualify sa Top 16 alang sa knockout stage nga maoy modeterminar kon kinsa ang magabot sa finals. Gawas sa ganting salapi aduna usay championship trophy ang makampyon sa torneyo.

Ang champion makabulsa og P15,000 ug P5,000 alang sa runnerup. Ang third ug fourth placers aduna usay madawat nga tag P3,000 ug P2,000. Samtang ang masulod sa Top 12 makasiguro na usab og tag P200. Ang entry fee nagkantidad og P200 samtang P150 ang re entry.

Ang mga tigpasiugda nga pinangulohan ni Allan “Colonnade” Milan naglaraw usab nga mohatag og mga gift packs pinaagi sa raffles alang sa mga partisipante.

Hugot nga miitsa sa ilang suporta sa lima ka adlaw nga kompetisyon mao sila si councilor Jerry Guardo, kinsa maoy chairman sa committee on youth and sports sa konseho, ug ingon man si Barangay Captain Clyde Seblos sa Buanoy, lungsod sa Balamban.

Alang sa dugang detalyi mahimong mokontak o mo text lang ni Milan pinaagi sa iyang cellphone number 09393585605.