GREEN MIBIDA SA WARRIORS
NAGPABUTO og walo ka three-point bombs si Klay Thompson samtang nimugna og talagsaong triple-double si Draymond Green aron agakon ang Golden State Warriors sa 122-107 nga kadaugan batok sa host Memphis Grizzlies kagahapon sa National Basketball Association (NBA).
Ang walo ka tres ni Thompson maoy nagbuwak sa iyang kinatibuk-ang 36 puntos. Si Green igo lang nimugna og upat ka puntos apan nakahipos kini’g 12 rebounds, 10 assists ug 10 steals nga labing unang nahitabo sa kasaysayan sa NBA.
Si Kevin Durant nidugang og 24 puntos alang sa Warriors, niamot og 22 puntos si Andre Iguodala samtang nihatag og 18 puntos si Stephen Curry.
Ang Warriors mingsaka sa 45-8 nga rekord samtang ang Grizzlies natagak sa 33-23 nga baraha.
Ang Grizzlies gipangulohan ni Mike Conley pinaagi sa iyang 20 puntos, nitunol og 17 puntos matag usa sila si Marc Gasol ug Zach Randolph samtang nihatag og 15 puntos si Tony Allen.
Si Warriors coach Steve Kerr nakadayeg og maayo sa gipakita ni Green sa ubang mga departamento ug alang kaniya, mao kini ang nagdala kanila sa kadaugan.
“That says it all right there,” matod ni Kerr kabahin sa triple-double ni Green. “Draymond dominated that game. . That’s as dominant of a performance as I’ve ever seen from somebody who scored four points.”
Gawas sa iyang triple-double, si Green nakamugna sab og lima ka block shots.
“I knew Klay was knocking down the shots, so I knew the assists started to get up there,” asoy ni Green, “but I really didn’t know where I was as far as rebounds and steals.”
Ang depensa sa Warriors maoy hinungdan nga nakamugna og daghang turnovers ang Grizzlies.
Sa pagsalimoang sa Grizzlies, ang Warriors nakatali og 51 percent shooting lakip na niini ang 15-of-33 sa three-point area. “When they make shots, they put you in a bad spot,” asoy ni Gasol. Hinayhinay nga ningbiya ang Warriors hangtod nga nakaposte sila og 98-77 sa 4th quarter ug human niini, wala na sila molingi pagbalik. NBA. Gilutsan ni Chicago Bulls forward Jimmy Butler (21) ang hugot nga depensa ni Phoenix Suns center Tyson Chandler ning aktuha sa usa sa mga aksyon sa NBA kagahapon.