LAWAS BUNGKAG
Drayber nabuthan sa napunitan nga granada
LAWAS sa habalhabal driver nabungkag human niulbo sa iyang mga kamot ang usa ka rifle grenade nga iyang napunitan kagahapon sa alas 10:05 sa buntag sa Sitio Tambisan, Barangay Tisa, dakbayan sa Sugbo.
Ang rifle grenade usa ka matang sa granada nga itiro gamit ang pusil aron layo ang abtan. Gigamit kini sa gubat batok sa mga tangke o nagpundok nga mga sundawo nga ang tumong aron paghimo og dakong kadaut.
Si Robin Genterone, 32, dunay kapuyo, habalhabal driver, namatay diha-diha tungod sa kakusog sa pagbuto.
Di na maila ang iyang nawong samtang ang ubang bahin sa iyang lawas nagkatag na sa dapit.
Si SPO4 Alex Dacua, chief investigator sa Homicide Section sa Cebu City Police Office (CCPO) nga nahinabi sa mga tigbalita, niingon nga inahan ni Genterone nibutyag nga mitubag sa sugo sa lawas ang iyang anak.
Sa pagbalik niini, dala na ang usa ka puthaw nga napunitan niini sa kalibunan ug posibling nahilabtan hinungdan nga nibuto.
Gibutyag ni Dacua nga ang maong lugar sa uwahing bahin sa dekada 80 usa sa mga dapit nga gitagoan sa mga rebeldeng New People’s Army (NPA). Posibling ang mao nga rifle grenade gilabay . Si Cristina Cañete, 32, nga nahinabi sa Superbalita Cebu, nibutyag nga katapusan silang nagkita sa iyang bana kagahapon sa kaadlawon.
Nipauli kini sa ilang balay aron mokaon ug namasahero og balik.
Pagkabuntag, ilang gipadad-an og kwarta aron ipalit og pagkaon sanglit wa niini gigamit ang kinitaan. Wa na sila magkakita nianang pagpamahaw.
Gipahibawo siya sa ilang mga silingan nga nabuthan ang iyang bana ug namatay hinungdan nakalitan kaayo siya ug ang iyang upat ka mga anak.
“Subo kaayo among Valentine’s Day, Sir. Bisag pobre makaselibrar unta mi. Unsaon kalit kaayo iyang pagpanaw. Wa siyay gipakitang timailhan. Kaadlawon mi last nag-estorya,maorag wala ra,” dugang ni Cristina.
Nagtuo siya nga gidukdok sa iyang kapuyo ang puthaw kay nagtuo kining dunay bronse nga ipatimbang unta niini.
Gipadayag niya nga gibadlong pa gani sa iyang inahan ang iyang kapuyo ug gipangutana kon asa niya nakit-an.
Nitubag lang kini nga nakit-an niya ug milakaw pagbalik.
Sumala niya nga intact ang kita sa iyang bana diha sa lawas niini ug wa gastuha.
Nagtuo siya nga gigahin kini alang sa ubang mga gikinahanglan sa ilang balay.
Si Daveen Silawan, 22, usa ka tinun-an, nisulti sa Superbalita Cebu nga nanghayhay siya niadtong higayuna sa ilang terrace nga nahimutang sa ikaduhang andana.
Nakita niya si Robin sa ubos nga dunay gibitbit samtang naglakaw.
Pipila lang ka segundos pagtalikod niya, kalit nga nilanog ang sipang buto daw sama sa tangke sa liquefied petroleum gas (LPG).
Niuyog ang tibuok palibot hinungdan nga pwerti niyang kuyawa uban sa iyang hinigugma.
Nidali silag tan-aw sa ubos. Ilang nakita nila ang baga nga aso. Nagtuo sila nga ang poste sa kilid sa ilang balay ang nibuto dayon nasunog hinungdan sa ilang kahadlok, nanawag sila sa silingan aron makatawag og bombero.
Nakita nila sa ubos sa paril ang pagsirit sa tubig sa Metropolitan Cebu Water District (MCWD) kay nabuslot ang mga pipe.
Ilang nakit-an ang lawas ni Genterone nga nabungkag.
Wa hinuoy laing nangaigo kay si Genterone lang ang naglakaw sa dalan niadtong higayuna.