Gibuwagan sa uyab misunog sa balay
SAMTANG nagsaulog ang kinabag-an sa Valentine’s Day karong adlawa,duha ka mga babaye nga wa makaaguwanta sa kasakit sa ilang gibati, nibuhat og managlahi nga mga butang.
Ang usa nisunog sa iyang balay kay wa siya makadawat nga gibuwagan sa iyang uyab nga foreigner samtang ang usa naghikog kay nagtuo siyang dunay lain ang iyang uyab nga construction worker.
Sa Consolacion, usa ka ginang misunog sa iyang dos andanas nga balay sa Second Batch, Brgy. Pulpogan, lungsod sa Consolacion kagahapon sa buntag.
Matod sa Consolacion Fire Station nga kini na ang ikalimang higayon nga nisuway og sunog ang ginang sa iyang balay sukad niadtong Disyembre.
Di mominos sa P40,000 ang danyos sa sunog nga nagsugod pasado alas 6 sa buntag.
Matod ni SFO1 Byron Casela sa BFP Consolacion nga ang tag-iya sa balay giila nga Noraisa Alondo, anaa sa mga 30 anyos ang pangedaron ug lumolupyo sa maong dapit.
“Since December, five times na ni siya no-attempt ug sunog sa iyang balay kay ingon pas iyang mga silingan, depressed daw ni siya human gibuwagan sa iyang Amerikanong uyab,” ni Casela sa mga tigbalita.
Dugang niya nga daghang mga silingan ang nakasaksi nga giduslitan ni Alonso ang iyang unlan sa ikaduhang andana sa iyang balay.
Nadawat ang alarma sa kabomberohan mga alas 6:59 kagahapon sa buntag ug hingpit nga napawong mga alas 7:02 sa buntag.
Lakip sa nasunog ang mga atop sa mga silingang panimalay ni Alonso.
Gidakop sa kapulisan si Alonso kinsa kasamtangang gibalhug sa Consolacion Police Station aron pasakaan og kasong arson.
Samtang sa Talisay, 31 anyos nga babaye nagpakamatay tungod sa kapait sa iyang love life uban sa iyang kapuyo.
Si Rosalie Pacañ,alyas Leah Pacaña, 31, nakitang nagbitay sa ilang gipuy-an sa sitio Ranger, Barangay Mohon.
Matod ni PO3 Erwin Carbonquillo sa Talisay City Police Station, aduna silay nakuhang suicide note ni Pacaña ug nisaysay sa kapait sa iyang sitwasyon sa gugma uban sa iyang kapuyo.
Gipadayag niya nga nagselos siya tungod kay aduna’y laing gikalingawan nga babaye ang iyang kapuyo nga si Leborio Conde Jr., 34, usa ka construction worker.