P13 nga umento alang sa tanang mamumuo sa Central Visayas
IPATUMAN sa Regional Tripartite Wages and Productivity Board sa tibuok Central Visayas ang P13 nga umento sa minimum nga suhulan sa mga mamumuo nga giaprobahan sa board sa miaging semana.
Si Jose Tomongha, labor representative sa RTWPB 7, nikompirmar nga nasabutan sa tanang mga sakop sa board atol sa ilang tigom kagahapon nga ipatuman ang usbaw sa sweldo sa upat ka mga lalawigan sa rehiyon siyete nga gilangkuban sa Sugbo, Bohol, Siquijor ug Negros Oriental.
“Way katarungan ang wage board nga i-exempt ang ubang lugar gawas sa Metro Cebu kay naka-recover na sa ilang ekonomiya ang ubang mga dapit (naapektuhan sa kalamidad),” pamulong ni Tomongha sa pakighinai sa Superbalita Cebu kagahapon.
Matod niya napirmahan na nila mga sakop sa RTWPB 7 ang Wage Order No. 20 ug napadala na kini pinaagi sa email ngadto sa National Wages and Productivity Commission.
Sa mao nga kamandoan, nalatid ang P13 nga usbaw sa minimum nga sweldo alang sa mga mamumuo sa Central Visayas.
Human sa usa ka semana, ibalik kini dinhi sa Sugbo ug ipublikar sa mantalaan nga mabasa sa tanan ug human sa 15 ka adlaw gikan sa pagpublikar niini, moepekto na ang bag-ong suhulan.
Mamahimo na unya nga P366 ang minimum nga sweldo gikan sa P353 sa kasamtangan. Sa miaging Wage Order No. 19 nga gipatuman niadtong 2015, wa maapil ang mga dapit sa amihanang Sugbo nga apektado sa bagyong Yolanda ug Bohol nga apektado sa linog tungod kay apektado ang ilang ekonomiya diin daghang mga patigayon ang nangagusbat ug naglisod og bangon ang mga negosyante.