Sa panahon nilang Lolo ug Lola

GIUNSA og pagpakilig ni Lolo o ni Lola ang ilang mga hinigugma atol sa Valentine’s Day sa dihang batan-on pa sila?

ELEAZAR SARCHEZ, 69

Si Sarchez nagtrabaho sa Naval Base isip usa ka chief

operator sa Crusher sa Olongapo City sa tuig 1966. Nahimo siya nga supervisor sa minahan sa Tacloban City. Lumad siya nga taga Argao apan karon anaa na nanimuyo sa dakbayan sa Sugbo ug nagtrabaho isip usa ka

commisioner sa mga sakyanan sa Punta Princesa.

Lingaw-lingaw nalang ang iyaha tungod kay pensyonado na siya ug mga professional na ang iyang duha ka anak.

Ang ilang komyonikasyon kaniadto sa iyang mga nauyab mao lamang ang pagpadala og mga sulat o special card pinaagi sa RCPI. Dili siya ganahan nga manuroy kay naghilas-hilas lang kini.

Mas maayo usab nga dili kalimtan sa Valentines Day nga pahinumdoman pinaagi sa paghatag og bulak sa hinigugma ug pag-surprisa niini ug ipakita nga mahal gyud ang uyab.

Tambag niya sa mga kabataan karon: Unahon una ang pag-eskwela, unya na mag-uyab-uyab kay lisod na kon mabuntis lagmit maguba ang kaugmaon.

PRIMO SANCHEZ, 67

Si Sanchez adunay 9 ka anak, kapin sa 30 ka mga apo ug 5 ka apo sa sungkod. Daghan na usab siya nga mga trabaho nga nasudlan sama sa pagka panday, mason, pamaligya og kahoy, pagpamaligya og uling ug sa pagka karon loader siya og basura sa Barangay Punta Princesa, Cebu City ug nanimuyo na siya karon sa Barangay Toong, Cebu City.

Lahi iyang estilo kaniadtong 1960’s sa dihang batanon pa siya, ilabi na nga bukid ang ilaha. Wala ra niya nasulayan ang pagpanghatag og bulak sa iyang hinigugma. Ang iyang estilo mao lamang ang pagpamisita og pagdiskarte sa babaye.

Kaniadto kon kursonado ang lalaki sa babaye matagbaw pa og gukod-gukod tungod kay dili mosikit sa lalaki ang mga babaye.

Wala niya nasulayan ang mga bayle-bayle tungod kay kaniadto walay kuryente ug ang mga suga lamparilya lang. Ug kon aduna man gani bayle, sista lang ang gamiton ug dili puno.

Tambag niya sa mga kabataan karon: Mas maayo nga dili magpataka og panguyab gamit ang social media ug celfone. Mas maayo kon sa personal buhaton aron makita ang hitsura sa babaye, dili kay magbase lang sa nindot nga tingog.

EDUARDO SAYSON, 63

Si Sayson usa ka kanhi

seaman ug nagtrabaho na karon isip tanod sa Calinawan Compound. Siya nanimuyo sa Tres de Abril, Labangon, Cebu City.

Duha lang ang iyang nauyab kaniadto; ang usa ang iya karon nga nadayon.

Atol sa Valentines Day kaniadto, kasagaran magselebrar sila dayon hatagan niya og bulak ug chocolate timaan sa pagpangga sa asawa o uyab para malipay.

Ang sikreto aron molungtad ug magdugay ang kaminyoon mao ang pagsinabtanay sa usag-usa. “Kung mag-away mo, ang usa kayo, ang usa tubig gyud na. Kay kung pariha mo, silaob gyud.”

Tambag niya sa mga kabataan karon, ilabi na sa mga walay ka- date karong Valentines Day: Paglingaw nalang sa kaugalingon sama sa pagbuhat kon usa’y hilig. Apan dili maayo nga mangita og babaye og pugos tungod kay kuyaw ang panahon karon. Daghan baya nagka-Aids.

WILMA ESTENSO, 59

Si Estenso maninda og trapo ug newspaper duol sa Cebu City Central School kauban sa iyang bana. Sila nanimuyo sa P. del Rosario St., Kalubihan, Cebu City. Moabot sa kapin sa gatos ang mahalin nga Superbalita

Cebu sukad magabii. Ipahatod nalang nila ang ilang baligya nga newspaper tungod kay dili na si Estenso makalakaw ug nag- wheelchair nalang. Ang iyang bana maglisod na usab apan aduna silay mga anak nga makatabang. Aduna sila’y 6 ka anak ug 16 ka apo.

Sa Valentines Day sa iyang panahon niadtong 1960’s ngadto sa 70’s, mamisita ang lalaki ug magdala og bulak sa balay sa babaye.

Kaniadto pamisitaan ug haranahan kon adunay makagusto nga lalaki sa babaye. Karon, abot-aboton nalang sa daplin-daplin ug panguyaban nalang pinaagi sa text ug sa social media.

Istrikto ang iyang mga ginikanan kaniadto. Bisan gani ang iyang kamot dili ipahikap sa mga lalaki kay kon magpahikap dili na kuno birhen.

Kaniadto ig Valentines Day, kasagaran nga ihatag nga gasa sa iyang uyab nga nakapakilig niya mao ang

perfume ug bulak. Nasakmuyo siya sa iyang mga makita nga mga ulitawo ug dalaga nga manag-uyab pa magkuyog manulod og lodges. Ug ang mga babaye mugbo kaayo og mga gisuot.