Happy Valentine’s Day

KARONG adlawa, mao ang adlaw sa pagminahalay. Adlaw sa pagpakita ug pagpadayag sa dakong gugma ngadto sa matag usa.

Dunay mga tawo nga ilang dad-on ang ilang mga minahal ngadto sa usa ka dapit ug talagsaong lugar nga alang kanila naghatag og dakong kahulogan sa pagbati nga ilang gisaw-an.

Aduna usay mogasa og chocolates, greeting cards, alahas ug bisan gani buwak ug uban pa sa tinguha ug pangindahay nga kini makahatag og kaligon sa pundasyon sa ilang relasyon.

Ang Valentine’s Day dili lang alang ngadto sa mga manag-uyab kon dili selebrasyon usab ngadto sa mga pamilya.

Aduna usay bisan og gidistansiya sa halagyong dapit ang mopahigayon og panagtigom sa tibuok kabanay aron saulogon ang katam-is sa kahiusahan.

Sa laktod nga pagkasulti, karong adlawa mao ang adlaw diin atong ihikling ang kalagot ug pagdumot ngadto sa matag usa ug sa samang higayon atong ihulip ug ipatugbabaw ang katam-is sa pagminahalay.

Apan ang pangutana kon unsa ang sinugdanan ug diin magagikan ang Valentine’s Day ang hangtod karon wala pa kahatagi og igong katino-an.

Adunay nagkanayon, nga kini nagagikan saysay ni St. Valentine, usa ka pari kinsa nahimong martyr niadtong Pebrero 14 sa tuig 270 CE.

Kon nganong nahimo siyang patron nga santos sa mga managhigugmaay kini maoy usa dakong misteryuso hangtod karon.

Mitumaw usab ang teyoriya nga ang simbahan migamit sa maong adlaw aron paghimo sa Roman Lupercalia, usa ka festival sa bulan sa Pebrero, nga usa ka Kristiyanismong kalihukan.

Tinuod nga wa matuki ang lintunganay niini, apan ang matam-is nga selebrasyon sa pagminahalay nagpadayon.

Happy Valentine’s Day!