Mga baga’g nawong!

HAPPY Valentines! Kining adlaw nga ato pirmi nga gisaulog matag Feb. 14, ang panahon sa mga managhigugmaay, mao unta ang atong buhaton kada adlaw aron wa nay gubot.

****

ISIRA? Mibahad si Cebu City Mayor Tomas Osmeña nga iyang isira ang mga sanga sa Banco de Oro (BDO) dinhi sa dakbayan sa Sugbo. Pero, nagtuo ko nga dili idayon ni Mayor Tomas ang iyang giplano tungod sa daghan nga rason.

Una, ang maapektohan sa pagsira sa BDO mao ang mga depositor, negosyante ug yano mga tawo. Ikaduha, ang BDO di lang moduko lang og pawaot kay lehitimo man ang ilang negosyo. Ikatulo, kon isira ni Mayor Tomas ang BDO posible nga mobalhin sila ngadto sa mga dakbayan sa Mandaue, Talisay ug Lapu-Lapu.

Ang rason ni Mayor Tomas nga iyang isira ang BDO sa Magallanes kay gamay ra ang gideklarar nga income sa miaging tuig. Apan sa tinuoray suko si Mayor Tomas kay napalit sa SM ang mga lote sa SRP sa panahon ni mayor Mike Rama bisan pa sa iyang pasidaan.

Usa ka retirado nga manager sa bangko miingon nga tinuod nga gamay ra ang madeklarar nga income sa mga sanga sa bangko tungod kay adto man sa ilang head office sa Manila ipadala ang kinatibuk-an nga kita.

Mayor Tommy, ipasusi sa og maayo sa imong mga abogado ug consultants aron di mapalpak ang imong desisyon nga isira nga BDO.

****

WAY UWAW! Ang mayoriya sa kamara baha uyon na nga ibalik ang death penalty sa mga heinous crime. Gani, ang kaniadto nga dili uyon sa death penalty mibali na sama ni Oriental Mindoro Cong. Reynaldo Umali.

Sa miagi, Speaker Bebot Alvarez mibahad sa iyang mga kauban sa super majority nga tangtangan sila og pwesto o wagtangon sila sa partido kon dili moboto nga ipasar ang death penalty bill.

Usa sa mga supak mao si kanhi kongresista Gloria Arroyo kay sa iyang panahon nga Presidente way death penalty. Ang mga supak nga ibalik ang death penalty mihangyo kang Speaker Alvarez nga di sila pugson sa pagbotar.

Ang punto sa mga mibabag nga ibalik ang death penalty kay ang kadaghanan sa masentensyahan og kamatayon kadto rang mga pobre kay way ikabayad sa mga maayo o ngilngig nga abogado.

Si Makati City Rep. Luis Campos ug House Minority Leader misugyot nga magmugna og Capital Defense Unit nga maoy mohatag og maayong laki nga abogado sa mga kabus nga nag-atubang og kaso ang kamatayon ang silot. Ang kagamhanan ang mobayad sa abogado.

Abi ninyo ang mas grabe nga makauuwaw kay ang super majority kunohay nga mga kongresista dili mosugot nga dunay death penalty ang kaso nga plunder. Susmaryosep!

Naniguro nang daan ning mga baga og nawong (gawas sa maayo) nga di ma-silya elektrika o lethal injection kon moabot ang panahon nga sila masakpan nga nangawkaw sa atong bahandi og masentensyahan og kamatayon.

Kahibawo mo nga ang plunder law gimugna ni aron nga ang mga pinili ug mga tinudlo nga opisyales sa kagamhanan mahadlok mangawat sa atong pundo? Apil na niini ang mga sibilyan/negosyante nga makigkunsabo.

Matod pa ni Kongresista Umali nga dunay kahigayonan nga mareporma ang kawatan kay sa mopatay og tawo. Matod pa ni Umali sa ininglis, “Thieves reform, but a killer is a killer.”

Ayaw pakauwaw sa imong pagka kongresista, ingon man sa atong propesyon nga abogado. Ang mga kriminal bisan unsang klase nga salaod dunay panahon nga mareporma duna say mobalik.

Kining inyo gibuhat nga dili iapil ang plunder sa death penalty naghatag lang hinuon og pagduda nga mangawkaw mo bahandi sa nasud. Nahikalimot na mo sa bahad ni President Duterte batok sa mga kurakot?