Happy Valentines!
NAHIMONG viral diha sa social media ang labing bag-ong mga commercial sa Jollibee nga kabahin sa gugma. Saun nga Valentine’s Day man karon.
Wa nako makita kining maong mga video isip commercial sa telebisyon. Apan tungod kay nakagubot sa social media, nahimo kining balita sa telebisyon ug gikomentaryohan sa mga mantalaan.
Diha ko unang nakakita sa balita sa CNN dayon sa TV Patrol. Mao nga ako dayong gipangita sa Facebook ug sa Youtube.
Angayang mabalaka ang mga television networks ug ang mga mantalaan. Tilimadon kini kon ang usa sa labing dako nga advertiser sa telebisyon ug sa print adto na mogasto sa social media.
Duna lang koy makomentaryo kabahin sa mensahe sa Jollibee ads. Mura man gud gipaguwa nga bisan pag nagkahigugmaay tungod sa Jollibee, di gihapon magkadayon.
Sa laing bahin, tinuod bang mas daghan ang ma- firing squad karong adlawa? Alang to nga commercial ninyo, no.
BDO
Nagkanayon ang usa ka post diha sa Facebook account sa BDO Unibank nga wala kini molapas sa balaod kon ang hisgutanan mao na ang business permit.
Nisubay sila sa legal nga definition sa gross receipts sa ilang aplikasyon alang sa business permits sulod sa katuigan.
Nidugang kini nga sayop si Cebu City Mayor Tomas Osmeña sa iyang pagtandi sa P2,000 nga gibayad isip business tax matad tuig ug sa income tax nga P5,000 sa usa ka janitor.
Ang usa ka branch sa labing dako nga bangko sa Pilipinas igo lang mobayad og P2000 matag tuig. Di lang ta mogamit niining ehemplo ni Mayor Osmeña. Mangutana na lang ko sa bayranan sa buhis sa mga nagbasa karon niining maong lindog.
Naglibog lang ko karon kon basin ang nasayop mao mismo ang balaod ug nakakitag buslot ang BDO aron makabayad og barato.
Sori na lang sa janitor kay wala siya makapangita og buslot aron makabayad lang og gamay sa iyang iyang buhis.
O usa ba kini ka ehemplo nga mas gibuhisan pa ang mga kabus kay sa mga adunahan.
Alang kanako, bisan unsaon pagkisikisi sa BDO, kon P2,000 ra gyud ang ilang gibayad isip business tax, ambot mura man og kasuka-on ko nga naghunahuna.
PASIRAD-AN
Mao nga uyon ko niining pasirad-an kining mga banko nga igo lang mobayad og P2,000 matag tuig bahala na og legal ang maong kalaki.
Di gyud makiangayon sa mga ordinaryong mga magbubuhis.
Niingon man to si Mayor Osmeña nga iyang pasiradan ang maong BDO branch karong inig balik niya gikan sa Japan.
Nah, kuyaw nga mapagan niini karon ang atong pang-- Valentines. Happy Valentine’s Day ninyong tanan hurot!
ERMITA
Pipila na ka adlaw nga wala maka- takeover ang gitudlo nga caretaker diha sa Barangay Ermita kay gi- padlock ang barangay hall.
Politika gyud kaha ang hinungdan sa maong aksyon? Di lang gyud gusto ang nasuspenso nga liderato nga motakeover ang usa ka opisyal nga kontra sa politika?
O gikahadlokan karon nga maukay ang mga dokumento ug mga record sa barangay? Tan-awa nga mas importante pa nga way makasulod sa barangay hall kay sa madawat ang ilang sweldo.
Ang ako lang, di mahimong maingon niini ang kahimtang sa sunod pipila ka bulan. Andam ba ang taga Ermita sa epekto unya sa ilang gibuhat?