The way I love you
(Katapusan sa pito ka mga gula)
WAY
tingug-tingog si Leo samtang nagesnak mi sa school canteen. Giduwaduwaan lang niya sa gikuptan niyang tinedor ang giorder niyang cassava cake.
“Hapit nagbuntag sa paghinilak si Joy kagabii, Leo. Please adtoa siya unyang gabii. Alam-alami siya.” Ning higayona, gibati ko ang gibati ni Leo. Wa ko masuko niya.
Seguradong gisakitan siya sa gipasangil ni Joy niya. Wa man ko motuo sa giingon ni Joy nga girlfriend ni Leo ang gikaestoryang girl kagahapon sa library.
“Gisakitan na ko pag-ayo sa gibuhat ni Joy nako. Kanunay lang gyud ko niyang pakauwawan sa higayon nga makig-estorya kog babaye.” “Tagai siyag laing higayon, Leo. Pasayloa siya.” “Nganong ikaw man ang mopataliwa’a kon awayon ko ni Joy, Kareen? Siya man ang kanunay masayop. Di intawon nako uyab tong babaye nga gikaestorya ko sa library, uy. Nagkatupad man gud mi. Natural lang nga magkasultihanay gyud m.”
“Mao bitaw nay akong gipasabot kang Joy. Pero nagtuo gyud siya nga uyab nimo tong bayhana.”
“Kanunay lang gyud ko niya hukman dayon nga nakasa’a ko niya. Uwaw pa gyud kaayo kay apilon niyag away ang gikaestorya kong babaye.”
Naghilom na lang ko. Gitutokan ko ni Leo. Wa ko mahimutang sa matang sa iyang pagtan-aw nako. Morag duna siyay giklaro sa akong hunahuna. “Uy, Leo, kalain gud anang tinan-awan mo nako?” “Tubaga ko, Kareen. Nganong mopataliwa’a ka man dayon kon awayon ko ni Joy?” Mikatawa ko. “Sus, natural lang na, uy, Leo. Concern lang ko sa akong half-sister. Di ko gustong maguol siya.”
Miduko ko. Sa hilom nakaingon ko, ingon aning paagiha ang pagpakita ko sa hilom kong pagmahal nimo, Leo. Unya miginhawa kog lawom. Dugay nang duna koy hilom nga pagbati kang Leo. Apan giluom ko lang kini tungod kang Joy nga maoy girlfriend ni Leo. “Unta makakita kog babaye nga parehas nimo, Kareen.” “H-Ha?” Nakalitan ko. “Pero kon moabot ang higayon nga mahigugma ko nimo, Kareen, pangulitawhan ta gyud ka.”
Nagkatinan-away mig dugay si Leo. Unya, wa koy tingog nga mibiya niya. Nagdali kong migawas sa canteen. Nanglabay ang mga adlaw. Nagkabuwag gyud sila si Joy ug Leo. After two months, malipayon si Joy nga nakigsulti nako. “Duna na koy new boyfriend, Kareen. Sure ko nga siya na gyud ang laki nga para nako.”
Gipahiyoman ko lang ang akong half-sister. Unya, usa ka gabii namisita si Leo nako. Gidaygan ko niya sa iyang gugma. Malipayon kaayo ko niadtong tungora. (KATAPUSAN)