Tanan gisuwayan aron pagkab-ot sa kalampusan
GIKAN sa pagka mamaligyaay og tempura ug houseboy, hangtod nahimo nga Best Supporting Actor ang nalatasan ni Niño Baldevino.
Ang iyang kinabuhi sama sa usa ka binhi, iyang gialimahan pag-ayo, mitubo ug milambo uban sa kugi, determinasyon, wala pagkalimot sa gigikanan ug pag-ampo sa Kahitas-an.
Usa ka buwan gikan karon, ang 28-anyos nga ulitawo motapos sa kursong Bachelor of Arts in Communication sa University of San Jose-Recoletos, dakbayan sa Sugbo.
Ang kanhi negatibo og panghunahuna, nakaamgo nga dili mahadlok mosuway ug naningkamot nga makatapos sa pag-eskwela aron ugma damlag mahimo siya nga usa ka tigbalita.
Siya gikan sa lungsod sa Dalaguete, habagatang Sugbo. Ang iyang amahan nga si Saturnino, 56, usa ka mag-uuma, samtang ang iyang inahan nga si Emiliana, 58, usa ka mananahi.
Siya ang kamaguwangan sa duha ka magsuon.
Sa siyudad, naagian niya ang lainlaing mga klase sa trabaho ug kini maoy nakapaligon niya nga masagubang ang mga hagit sa iyang kinabuhi. Siya nianhi sa dakbayan sa Sugbo aron manarbaho samtang gipaeskwela usab siya sa iyang iyaan, maguwang sa iyang papa nga tua manarbaho sa abroad, og vocational course nga automotive mechanic. Sa iyang pagtungha, kon wa siya’y klase, motabang siya og paninda og tempura sa Fuente Osmeña ug A. Lopez ug pagka alas 12 sa udto mopauli siya aron mangandam pag-adto sa eskwelahan. Apan gumikan sa pinansiyal nga suliran, naundang si Niño. Aron makabayad sa iyang utang sa Cebu Technological School, nagpabulan siya isip usa ka houseboy. Human sa siyam ka buwan, napadayon niya ang pageskwela apan nibalhin siya og laing kurso nga practical electricity. Nitapos siya human sa usa ka tuig. Nadawat siya sa usa ka mall isip usa ka sales clerk hangtod na- promote pagka checker sa bodega. Apan, wa na siya mo- renew kay nagsakit ug nipauli siya sa ilang bukid sa Dalaguete aron magpaayo. Pipila ka buwan ang nakalabay, nadawat na usab siya sa usa ka mall sa dakbayan sa Talisay isip usa ka sales clerk ug bagger, ug pagtapos sa iyang kontrata, nadawat siya sa usa ka tindahan nga mamaligya og mga alahas. Na- contact usab niya og balik ang iyang iyaan nga gihimoan niya og account sa Facebook ug gigastuan na usab siya pag- eskwela og kursong culinary sud sa lima ka buwan sa University of Southern Philippines Foundation. Human niini, nakatrabaho siya sa usa ka fast-food chain isip usa ka service crew. Apan niundang siya kay wa makaabot sa minimum nga suhulan ang iyang nadawat nga sweldo. Ang iyang nadawat P152 inay P306 nga maoy minimum nga sweldo.
Nakasuway usab siya og trabaho isip usa ka messenger sa usa ka kompaniya nga gitrabahoan sa iyang kauban sa choir sa Basilica Minore del Santo Niño.
Dihang siya nagtrabaho isip usa ka messenger, nakaamgo siya samtang diha siya sa bodega nga gusto siya magdramatorgo sa radyo.
Apan kuwang siya og pagsalig sa kaugalingon tungod kay alang niya minos lang ang iyang mga nakat-onan.
Hangtod naabot ang panahon nga gipabungat siya sa iyang iyaan kon unsa gyud nga kurso ang iyang gusto nga kuhaon.
Niadtong Oktubre 2012, nadawat siya sa USJR human makapasar sa entrance exam.
Apan wa siya mosaba sa iyang giabtan nga balay nga nag-eskwela siya kay nahadlok siya nga basin og mahagbong sa klase.
Kon mouli usab siya sa ilang bukid, kon naay mangutana nga nagtungha ba siya, igo ra ni niya nga tubagon nga nagkonduktor siya og jeep pasaheroan nga 13C.
Karon, dili makatuo si Niño nga nakaabot siya og fourth year college ug graduating na karong Marso.
Kon kaniadto, wa siya’y salig sa kaugalingon nga minos lang og nakat-onan, dihay mga higayon nga naapil siya dean’s list.
Karong bag-o, siya ang nidaog isip Best Supporting Actor sa 2017 Sinulog Short Film Festival alang sa lilas nga “Sugilanon ni Lukas” nga nagsaysay sa kinabuhi sa usa ka ulitawo nga nirebelde sa iyang mga ginikanan apan nakaamgo sa iyang sayop nga binuhatan human niya nakaila ang character nga gidala ni Niño.
Ang iyang kagrupo sa USJR maoy nagkuha niya nga maapil sa short film.
Gikan sa iyang pagka tempura vendor, boy, sales clerk, checker, bagger, sales representative, messenger, service crew ug choir, karon layolayo na ang nakab-ot ni Niño nga kalampusan.
“Bisan og lisod, inubanan sa paningkamot, pag-ampo ug self confidence, mas maayo nga mosuway kaysa dili mosuway. Dili sa edad ang basehan kon interesado ka moeskwela, naa pay chance samtang buhi pa, naa pay paglaom,” pamulong ni Niño.